Ka jingphet seng bad jingshah thied kinongïalam ki dawbah jingtlot ka Congress

U President ka Meghalaya Pradesh Congress Committee (MPCC) u Bah Vincent Pala uba dei u kyrtong MP ka Congress ban iakhun ilekshon shiteng samoi na Shillong Parliamentary Seat ula ong ba ka Party ka la iaid shakhmat ban pynkhreh ia ka ilekshon ban wan.
Haba kren sha ki lad pathai khubor u Bah Pala ula kynnoh ka jingphet seng bad shah thied ki nongialam ki dei ki dawbah ka jingtlot ka Congress ha Meghalaya.
U Bah Pala ula ong, ka jingpynkhreh bad pynbit pynbiang na bynta ka ilekshon MP ka jan dep artad.
“Ngi lah dep ban pynbit pynbiang ia ka seng ha ka District bad Block Level. Mynta ngi dang iaid shakhmat na bynta ban pynbiang sa ha ka Booth Level. Na ka liang ka jong ngi, nga lah iaid pura bad baroh ki jingpynkhreh” ong u Bah Pala.
Ha kaba iadei bad ka thup kyrteng ki nongthep vote ne Electoral Roll, ula pynpaw ba ka seng ka la khmih bniah bha ia ka Special Summary Revision.
“Ngi lah ioh ia ki jingtip na ka ophis treikam jong u DC bad na ka Block ruh kumjuh. Nga tharai shen yn sa pyndep pura noh ia ka SIR hapoh ka 7 tarik u Risaw” ula ong.
Haba phai sha ka rukom treikam jong ka seng, u Bah Pala ula ong, ba ka seng Congress kam shym rem ha ki nongthep vote hynrei ka dei namar ka jingshah shet kylla na kiba napoh.
“Ka jingtlot ka Congress kam dei na ki nongthep vote, hynrei ka dei namar ki nongialam kiba la shah thied noh. Ki briew ki hap ban sngewthuh lada ka Congress ka tlot, ka imlang sahlang ruh kan mad ia ka jingeh” ula ong.
Ula kyntu ia ki nongthep vote ba kin khmih bniah ia kum kitei ki jingphet seng ha shwa ban wan ka elekshon shiteng samoi.
“Kumta, ki briew ki donkam ban pyrkhat shaphang kitei ki jingphet seng bad kito ba shah thied noh, mano ba thied ia ki, ka pisa ka jong no. Ki paitbah ki dei ban pyrkhat bha halor kane” ong u Bah Pala.
Wat hapdeng ka jingtynjuh, u nongialam ka seng Congress ula pynpaw ia ka jingkyrmen ba ka seng kan sakhie im biang.
“Haba nga leit kylleng kylleng, nga iohi ia ki briew ba ki dang ieid ia ka Congress, hynrei ki la shah ialam bakla ha ki katto katne ki riew shimet. Ngi lah shah pynrem tang katto katne por, hynrei phin sa iohi pat ba ka seng Congress kan sa kiew biang” ong u Bah Pala.
“Nga dang shu wan na Delhi bad nga la iohi ba kan sa kiew biang bad nga kyrmen skhem ba ngin sa poi biang sha kajuh ka kyrdan ba ka seng Congress ka don mynshwa. Ngi lah ban synshar bha bad ha ka lynti ba biang ia ki paitbah”.