U MLA ka Mawkyrwat, Bah Renikton L Tongkhar ha ka Sngi Ba-ar u la buh mawnongrim ia ki ar tylli ki project ha ka jingialang ha phyllaw jong ka Dorbar Hall Jakrem, 12 KM na Mawkyrwat, South West Khasi Hills District, kata, na ka bynta ka skhim Jakrem A & B Water Supply Scheme kaba la mang tyngka haduh T.15 klur bad ka surok shnong ban pyniasoh ia kawei ka dong ba khot ka Mawbasa kaba la mang T.1.40 klur bad baroh ar tylli la mang lyngba ka State Scheme. Haba kren ha ka jingialang, u Bah Renik u la ong ba kane kadei ka sngi sah jingkynmaw na ka bynta ka shnong Jakrem ha kaba ngi ioh ban buh mawnongrim ia kine ki ar tylli ki skhim, kiba ka sorkar ka la dep mang pisa ban pyntrei.
“Kine ki ar tylli ki maw kidei ki maw jong ka jingkyrmen ha kaba ngin sa ioh ban sdang namar ba ka sorkar ka la dep pyllait ia ka mang tyngka ban trei ia kine ki skhim, kiban long ka jingmyntoi ia ki paitbah. Ka shnong Jakrem ka la iaksaid na kawei ka snem sha kawei pat ban ioh ia ka skhim umbam umdih kaba biang, te hynrei na kawei ka snem sha kawei pat ki mih ki jingeh. Ha ki phew snem mynshwa ha ka por ba u Bah (L) Rowell Lyngdoh u la long u MLA, kane ka shnong ka la ioh ia ka skhim umbam umdih kaba heh, hynrei na ki daw ba bun kane ka skhim ka la pulom. Bad na ka skhim JJM ruh ngi la ioh, te hynrei kane ka skhim ruh kam shym la ai jinghun ia ki paitbah namar ka jingduna palat ka tyllong um. Te hynrei mynta ngi don ka jingkyrmen ba kane ka skhim mynta kan ym phiel shuh namar ba ka tyllong um jong kane ka skhim ka long na Wah Rilang, bad kumta ngi kyrmen ba kan long kaba jop,” ong u Bah Renik.
U Bah Renik u la kyntu ruh ia ki contractor kiban sa pyntrei ia kane ka skhim, ba kin sngewbha ban iatrei bha bad ban shim ia ka jingkitkhlieh, da kaba peit kano ka jait kam ba ki lah ban trei, ioh ba ka skhim ka shu sahkut ei. U Bah Renik u la kynthoh ruh ba bunsien ki contractor ki long ka daw jong ka jingsahkut jong ki kam pynroi ha ki dong ki thain tang na ka daw ba kim lah ban trei dep ia ki kam. Ha kaba iadei bad ka surok, u la iathuh ba mynta ka tnat PWD ka la pynkhreh ban shna pynbha ia ki surok hapoh shnong bad ban tih thymmai ruh katto katne na ka bynta ban pynkhreh ia ka jingwan ki Jingiaseng heh hapoh ka Balang COG bad Catholik hapoh Jakrem ha u snem 2027 bad 2028. Kumta, u la pynpaw ba kane ka surok sha Mawbasa kan sa long ka jingkyrkhu ia ki paitbah ka shnong Jakrem.
Na ka liang jong ka Kong AL Mawlong, DeputyCommissioner, ka la ong ba ka surok ka long u budlum jong ka ioh ka kot, bad ia kata la sngewthuh bha tang dang kito ki bym pat ioh surok ba haduh katno ki shitom ban die ne shalan ia ki mar ki mata ba ki rep ki riang, bad ka la ong ruh ba ka um ka long ka jingim, bad ka noh synniang shibun ha ka ioh ka kot jong ki briew ha kaba ki la ioh ban pynlut ia ka por ha kaba rem ba riang ha ka jaka ban leit tong um da ki kynta.
