Kyntu u Sniawbhalang ia ka KSU ban pynneh ia ka shongsuk

U Symbud Myntri Rangbah ka Jylla u Bah Sniawbhalang Dhar ula ong ka long ba sngewsih ban ïohi ia ka jingjia hynnin ka sngi bad ula kyntu ia ki paidbah ka jylla ban ban pynneh ia ka suk ka sain ha ka jylla.

Haba kren bad ki lad pathai khubor u Symbud Myntri Rangbah ka Jylla, ula kyrpad ïa ka KSU bad kumjuh ia kiwei ki seng bad ki paidbah ka Jylla ba kin pynneh ïa ka jingsuk.

“Ka jingjia ka long kaba sngewsih shisha, kaba ka Sorkar Jylla, khamtam na ka liang jong nga, ngim lah satia ban pdiang. Nga kyrpad ïa ka KSU bad ïa baroh ki seng bad ki paidbah ka Jylla, to ngin pynneh ïa ka jingsuk. Lada don kano-kano ka jingeh ne ka jingdawa, ka jingkhang jong ka Sorkar ka long barabor kaba plie na bynta ka jingïakren,” u la ong.

Haba ïadei bad ki jingdawa jong ka KSU, u Bah Sniawbhalang ula ong, ba ka Sorkar ka tip ïa ki jingdawa bad ka long kloi ban ïakren.

“Lada ki don ki jingdawa, to kin wan ïakren. Ngi long kiba kloi ban ïakren bad ki. U Myntri Rangbah bad u Bah Wailadmiki Shylla ruh ha ka sngi Balang ki la dep ban pynpaw shai ba ki long kiba kloi ban ïakren. To ngin peit ha kine ki sngi shisngi ne ar sngi,” la ong u Bah Sniawbhalang.

Haba kylli la ka Sorkar kan khot ïakren ia ka KSU, ula ong, ba u Myntri Rangbah u dang don shabar kumta ynda u la wanphai, yn sa shim ïa ka sienjam kaba dei.

“U Myntri Rangbah um don hangne. Ynda u la wan phai, ngin sa shim ia ki sienjam kiba dei,” u la ong.

Haba ïadei bad ki jingktah na Assam, u Bah Sniawbhalang ula ong ba ki Sorkar Meghalaya bad Assam ki la dep ïakren halor kane ka bynta, watla ka jingïakren kam long ha ka kyrdan jongu.

“Ka jingïakren ka long, katkum ka jingïohi jong nga, ha ka kyrdan Myntri Rangbah bad Myntri Kam Pohïing. Ki Myntri Rangbah baroh ar tylli ki Jylla bad ki Myntri Kam Pohïing ki don ha ka jingïakren halor kane ka kam. Nga ngeit ba shen ka jinglong-jingman kan wanphai noh sha ka jinglong kaba biang,” ula ong.

U Symbud Myntri Rangbah ula ong ruh, ba ka Sorkar ka tip bha ïa kaei kaba lah ban jia haba don ka Rally ne ka jingïakhih, hynrei ka jingkhmih lynti ka long ba kino kino ki Rally kin long kiba jai jai bad kiba iaid beit.

“Ka KSU ruh kala dep ai ka jingtehkular ne ‘Undertaking’ ha u Deputy Commissioner ba ka Rally kan long kaba jai jai. Kumta ka Sorkar kan peit bniah ïa kane bad kan sa rai kumno ban leh bad ban pynbeit ïa kane ka bynta,” ula ong.