Ki surok ha New Jirang ki la sniew lut, palat 28 snem ka PWD kam shym maramot

Ki surok ha New Jirang kynthup ka shnong Wahsynon, Umlakro, Centre Village, Umsohpanan bad Iowsohksang ki la pra bad sniew lut na ka jingkhoh ka rong, namar ka tnad PWD ba dei peit kam shym maramot la bun snem ia ki surok ha shnong New Jirang, Ri Bhoi District.
La iathuh ia kitei ki surok ha New Jirang la shna ha ka por ba long ka jingiaseng KJP Synod ha u snem 1998 da ka tnad PWD, hynrei kaba lyngngoh ka long mynta la palat 28 snem ka tnad PWD ka la shu iehnoh kumto bad kam shym la peit ban maramot kaba pynlong ia ki surok ban kylla kum ki surok khyndew na ka jingkhoh ka rong na ka daw ka jingther slap.
Haba kren bad u nongthoh khubor katto katne ki rangbah shnong ki la pynpaw ka jingsngewkhia ia ka jingleh klet ka tnad PWD ban maramot ia kitei ki surok shnong ba ki paidbah ki leit ki wan man ka sngi bad ki la kyntu ia u MLA/MDC ban tuklar bad iakren ia ki bor sorkar na bynta ka jingbit jingbiang jong ki paidbah nongshong shnong.
Ki la pynpaw ka jingsniew ki surok ka long shaba palat hapoh ki shnong ha kaba ki paidbah ki kynduh jingeh ban leit ba wan khamtam ha ki aiom lyiur ba jur slap.
Kum ban pynpaw ka shnong New Jirang ka dei ka nongbah jong ka Hima Jirang ha kaba ki paidbah ki leit ki wan man ka sngi, khamtam ha ka sngi Iew Jirang ban pyndep ia ki kam ki jam ba iadei bad ka Hima bad kumjuh ban thied ia ki jingdonkam ha iing ha sem. Kumta ka sorkar ka dei ban maramot noh kloi ia kitei ki surok na bynta suk ka leit ka wan ki paidbah ka thain khamtam ka kit ka bah haba ki donkam.