Nga la iakynduh bad iakren ia ki MLA, kim shym pynpaw ban leit rung BJP: Metbah

U Myntri Sorkar ba dei ruh u President ka United Democratic Party (UDP) u Bah Metbah Lyngdoh hynne ka sngi ula kyntait ia ki khubor ba 9 ngut ki MLA ka UDP ki la thmu ban iasoh sha ka Bharatiya Janata Party (BJP).

Kane ka wan tang shisngi ba la saphriang ha ki rynsan Social Media ba bun ki MLA kynthup ki Myntri Sorkar jong ka UDP ki don ba Guwahati, Kolkata bad Delhi ban iakren bad ki nongialam ka BJP na Delhi ban iakren pynbeit ban pynrung ia ki 9 ngut ki MLA jong ka UDP sha ka BJP.

Haba kren shaki lad pathai khubor u Bah Metbah ula ong, ba kine ki khubor ki mih tang hadien shi bnai mynshwa ka kynhun MLA jong ka UDP ki la kynduh ia u Myntri Sorkar Pdeng u Amit Shah ban iakren halor ka jingthmu wanrah jingpynkylla ia ka FCRA.

U Bah Metbah ula kam ruh ba u sngew kyndit ban iohi ha ki lad pathai khubor ba ma u ruh u don sha Delhi ban iakren bniah halor ka jingthmu pyniasoh noh ka UDP bad ka BJP.

“Hoid hadien ka sngi khatduh jong ka dorbar ki la don katto katne ki MLA kata u Bah Puis Marwein, Kyrmen Shylla, Lahkmen Rymbui bad u Bah Shynshar Lyndoh ki la pyntip ba kin leit sha Kolkata na bynta ki kam shimet hynrei kam don eiei ka kam Politics kumba la pynmih ha ki lad pathai khubor” la ong u Bah Metbah.

U Bah Metbah ula ong ba jan baroh ki MLA jong ka UDP ki don ha la ki constituency bad ha shnong hynrei ka long ba bakla ba ki lad pathai khubor kin shu kam ba ki don sha Guwahati, Kolkata bad Delhi.

“Nga kyntu ia ki lad pathai khubor ba kin da pynshisha shwa da kaba phone ruh namar kane ka jingpynmih ia ki khubor khlem da pynshisha ka ialam bakla ia u paidbah” ula ong.

U Bah Metbah ula iathuh ba ula dep iakynduh ia baroh ki MLA bad haduh mynta kim shym pynpaw ba kin rung sha ka BJP hynrei kine baroh ki paw tang ha ki lad pathai khubor.