Ki daw ka jingiakynad ka UDP ba bujli myntri, 9 ki MLA kin leit rung BJP bad 2 ngut sha kiwei ki party

U Nongialam ka UDP bad u MLA ka West Shillong Constituency u Bah Paul Lyngdoh ula kubur ka don ka jingbynniaw hapdeng ki MLA ka UDP bad kane ka la pawshai kdar ha ka jingialang jong ka General Executive Council (GEC) bad la mih ki khubor ba 9 ngut ki MLA ka United Democratic Party (UDP) ki lah ban leit rung noh sha ka seng BJP.

“Ha ka jingialang ka GEC ha ka taiew ba lah dep, jan baroh ki kren ki la pynpaw ha ka jingialang ia ka jingbynniaw halor ka jinglong jingman ka UDP bad ba kim ïohi ïa ki dak ki shin ka jingsan bad jingkiew ka seng. Nga tharai kata ka long ka daw balei ki mih kine ki khubor” ong u Bah Paul Lyngdoh bad ka bynrap, “Ngam ju mlien ban kren na rieh bad nga kren markhmat ha ka jingialang ka GEC bad pan ïa ka kaiphod treikam 2 ngut ki Myntri ka UDP, hadien ba la bujli myntri thymmai bad nga ngeit kata ka dei ka daw ki lynga ki pisa bad ha ka jingbym iohi ia ka jingiaid shakhmat ka seng, nga sngew ba kata hi ka daw ba pynlong ia ki para MLA ban phai sha kawei pat ka lynti iaid”.

Ula bynrap ha ki ar snem shiteng ba u long u Myntri kam shym don ka dak orpait ha ka UDP, hynrei mynta tang shisnem ba la kylliang Myntri ka mih ka khubor ba 9 ngut ki MLA ki thmu ban rung sha ka BJP katba ar ngut ki MLA kin leit rung sha kiwei ki seng saiñ pyrthei.

U Bah Paul ula kyntait ba u dei u nongïalam ka kynhun jong ki 9 ngut ki MLA ka UDP bad ula ong, ïa mynta ka paw ba u Bah Lahkmen Rymbui u dei u nongïalam ia kane ka kynhun bad kaei ka ban jia ha ki taïew ban wan ym lah ban tip bad shi taïew ka dei ka por ba jlan ha ka politik”.

Halor ka jingkylli u Bah Paul ula ong, Lano, kumno ki MLA kin leit iasoh BJP um don jingtip namar u don bynta ha ka jingleit kynduh ha Delhi bad Kolkatta, hynrei ka kynhun ba ialam da u Bah Rymbui bad ki MLA ba leit iakynduh ia u Amit Shah ki don ha ka kyrdan ba biang ban jubab ia ka jingkylli.

U Bah Paul ula ong, kumba paw ka long shai ka jingnoh arsut ka UDP, ka jingkiew ka seng VPP bad ka jingkiew ka BJP ka ioh ia ki 9 ngut ki MLA bad ka long kaba donkam ban tih bniah naei kine baroh ki jia.