Kem ka SIT ia u nongialam KSU, bitar ki longkmie Nongmensong

Ka kynhun tohkit Special Investigation Team (SIT) ka tnat pulit ba la thung ban tohkit ia ki kam thombor ba jia ha ka jingiaid rally arshaka ka Khasi Student Union (KSU) ha ka 19 tarik Nailar, ka la kem sa ia uwei u nongialam kane ka KSU.

Haba kren sha ki lad patahi khubor u Superintendent of Police (SP) ka East Khasi Hills u Bah Vivek Syiem ula iathuh ba une u nongialam ka KSU ba dang kem u dei u Samuel Kharbani jong ka KSU Nongmensong Unit bad la kem ia u ha ka sngi Palei hadien ka jingpynshisha ia ka jingdonkti jong u ha ki kam thombor.

Lah ban kdew ba 2 ngut ki dkhot ka KSU na Nongmensong ki la shah khot hajir sha Mawdiangdiang Police Station halor ka jingiakhih pyrshah ia ka jingtei mandir hapoh ka phyllaw ka Ophis CBI.

“Katba ka jingshim jingthoh ia ki jingbatai (statement) jong ki ka dang iaid, ka SIT ka la shong bishar ia ki kam thombor ba jia ha ka 19 tarik Nailar” ong u Bah Vivek.

“Hadien ba pynthikna ia u Samuel Kharbani la kem da ki pulit, katba ia u Celestine Lyngdoh kim shym lap ba u donkti bad ki la pyllait noh” ong u SP.

Shuwa kane ka jingkem, ki Pulit ki la kem ia 4 ngut ki nongialam ka KSU halor ka katei ka jingjia ha ka 19 tarik Nailar, ha kaba bun ki kali ki shah thang artylli bad palat 31 tylli ki kali ki shah pynjulor bad kumba 16 ngut ki riew paidbah ki la mynsaw.

Ha kajuh ka por, Ki nongialam ka seng longkmie Nongmensong ki la pynpaw ka jing bitar jur halor ka jingkem ki pulit ia ki samla ka Khasi Students Union (KSU) halor ka jingkynnoh ba ki donkti ha ka jinghuri hura ha ka rally kaba long ha ka 19 tarik, Nailar.

Kine ki longkmie kiba la wan synran halor ka jingshah khot hajir ki dkhot ka KSU Shillong Mihngi Circle ha Sadar PS, kila pynpaw ia ka jingkyndit ba u don u dkhot ka KSU na Mawkasiang uba khlem leit sha ka rally hynrei la kem ia u mynta ka sngi.

Ka kong Marget Khyriem ka President ka seng longkmie Nongmensong ka la ong ba ka jingkhot hajir ki pulit ia kine ki samla ka long halor ka jingpyrshah ia ka jingtei ia ka mandir ha kper ka CBI, Shillong hynrei kaba lyngngoh ka long ba ynda kila poi hangne kila kem pynban da kaba pynngat ba ki donkti ha ka rally ka KSU ha ka 19 tarik mynshem bnai bad don uwei uba iathuh ba u khlem leit rally hynrei la kem ia u bad pynngat case lang.

“Kine ki samla ki wan ban hajir hynrei ki la pynngat pynban ia ka kes kaba iadei bad ka rally. Uwei u samla na Mawkasiang haba u khlem leit rally, kumno u shah kem. Kane kadei tang ka jingpharep ki pulit,” ong ka kong Margret.

Kila pynrem jur ia ki pulit ban shu kem khlem nongrim ia ki samla, kaban pyntroin ia ka lawei jong ki.