Hadien 25 snem ioh iing skul thymmai ka Lebiwell Memorial Secondary School

Ka Lebiwell Memorial Secondary School, Umling, Ribhoi District, da ka jingkmen ka la rakhe ïa ka jingdap 25 snem jong ka jingïaid lynti jong ka skul ban ai ïa ka jingnang jingstad sha ki khynnah bad samla pule jong ka thaiñ bad ha kane kajuh ka sngi la plie paidbah ruh ïa ka building thymmai jong ka skul kaba la tei itynnad ha katei ka jaka.

Ha kane ka sngi kyrpang, u Myntri ka tnat Pule Puthi ka jylla, u Bah Lakmen Rymbui, ula wan ban shim bynta kum u Kongsan ha ka jingiadonlang u MLA ka Nongpoh, u Bah Mayralborn Syiem, kum u Symbut Kongsan.

Kiwei pat ki ba la donlang ban sakhi ia katei ka sngi ki kynthup ïa ka Kong Rona Khymdeit, MDC Nongpoh, u Bah Mathew Makdoh, Nominated MDC, ka Headmistress ka skul, Kong Miriam Mawrie, u Bah Luistar Lyngdoh, Acting Sirdar ka Elaka Nongpoh Sirdarship, u Rangbah Shnong Bah Commend Wahlang, ryngkat bad kiwei ki riew rangbah bad nongïalam shnong.

Ka Lebiwell Memorial Secondary School la seng ïaka ha ka 5 tarik u Rymphang 2001, da ka jingthmu ban kyntiew ïa ka pule puthi bad ban sam jingnang jingstad kiba kham bha sha ki khynnah jong ka thaiñ.

Katkum ka khana lyngkot ba la Pynpaw ha kane ka sngi la ïathuh ba ka jingpynieng ïa kane ka skul ka la wan na ka jingangnud jong u Late Lebiwell Lyngdoh, u Rangbah Briew naka shnong Umling uba la ju don ka jingangnud kaba kyrpang ban kyntiew ïa ka pule puthi ha ka thaiñ.

Ban pynurlong ïa katei ka jingangnud jong u Late Lebiwell Lyngdoh, ka Kong Miriam Mawrie, Kong Sianti Mawrie bad u Bah Augustine Wahlang, ryngkat bad ka jingkyrshan jong ka Kong Isida Mawrie, ka kurim jong u Late Lebiwell Lyngdoh ki ba la ïeng skhem bad seng ia katei ka skul bad ban ai burom ruh ia utei u Rangbah dakaba ai kyrteng ïa katei ka skul daka Lebiwell Memorial Secondary School, Umling.

Wat hapdeng ki jingeh kiba bun ha ki snem ba sdang, ka skul ka la ïaid shaphrang lyngba ka jingïatreilang jong ki nonghikai, ki nongpynïaid bad ki dkhot jong ka skul committee. Ka jingtrei shitom bad ka jingaiti lut jong kine ki riew rangbah ka la pynlong ïa ka skul ban ïeng skhem bad ban kynjoh sha ka 25 snem haka jingïaid lynti jong ka.

Nalor ka jingrakhe iaka Jubilee Rupa la ioh ruh ban plie paidbah ia ka building thymmai jong ka Skul ïakaba la shimti da u Bah Lakmen Rymbui ryngkat bad u Bah Mayralborn Syiem ban plie paidbah ïa katei ka building thymmai. Ka jingtei ïa kane ka building ka dei kawei na ki sienjam ban nang pynbha ïa ki jingdonkam ha ka pule puthi bad ban thaw ïa ka jaka pule kaba kham bit kham biang na ka bynta ki khynnah skul.

Haba kren ha ka jingïalang, u Bah Lakmen Rymbui u la ai jingïaroh ïa ki nongseng jong ka skul kiba la shim ïa ka sienjam ban seng ïa ka skul bad ban ai ïa ki khynnah ka lad ban ïoh ïa ka jingnang jingstad kaba ïahap bad kiwei ki skul. U la pynpaw ruh ïa ka jingdonkam ban pynjanai ïa ka rukom ai jinghikai bad ban pynbit pynbiang ïa ka pule puthi katkum ki jingkylla bad ki jingdonkam jong ka juk mynta.

U Myntri u la ai ruh ka kitbok kitwriang ïa ka skul, ki nonghikai bad ki dkhot committee jong ka skul ba kin dang ïai trei shitom ban kyntiew ïa ka kyrdan jong ka skul bad ban pynïar shuh shuh ïa ki jingshakri na ka bynta ka lawei jong ki khynnah pule.

Ha kawei pat ka bynta, ki bor pynïaid jong ka skul ki la pynsngew ïa ki jingdonkam bapher bapher kiba ïadei bad ka jingpynbha bad kyntiew ïa ka pule puthi da kaba aiti ïa ka memorandum sha u Myntri ka Pule Puthi bad sha u MLA ka Nongpoh.

Ïa kane ka jingrakhe Jubilee Rupa la pynphuh pynphieng da ki jingpule ïa ka histori jong ka skul, kaba la wanrah da u Bah Augustine Wahlang, uba long ruh uwei na ki nongseng jong ka skul ha ryngkat ka jing pynbyrngia da Ki khynnah skul kiba la shimbynta ba ki jingrwai bad ki jingshad bapher bapher.

La sam ruh ïa ki khusnam bad ki jingai sngewbha sha kito kiba la don bynta bad ka jingïaid shaphrang jong ka Lebiwell Memorial Secondary School, kum ka dak jong ka jingsngur bad ka jingsngewnguh ïa ka jingïatreilang jong ki ha kine ki 25 snem ba la leit.