Ïaid beit ka jingïalang halor ka tih dewïong da ka juk stad saïan

Ka jingïalang hapdeng ka Sorkar Meghalaya bad ka Additional Secretary jong ka Ministry of Mines and Geology, jong ka sorkar India, ka Rupinder Brar, ka la long kaba seisoh bad kaba ïaid shakhmat halor ka mat jong ka thong ban tih dewïong katkum ka juk stad myntan lane scientific mining ha Meghalaya.

Ia kane la pyntip daka MLA jong ka Sutnga Saipung constituency ka Kong Santa Marry Shylla bad ka la iathuh ba ha kane ka jingialang la pyniaid da ka Rupinder Brar ha ryngkat ka jingdonlang ki ophisar na ka tnad Mining jong ka Sorkar Meghalaya bad u Law Secretary u Bah CVD Diengdoh.

Haba kren shaki lad pathai khubor ka Kong Santa kala ong “Ka jingïalang ka la long kaba seisoh namar ki ophisar ki la buddien ïa kane ka bynta jong ka scientific mining ba dei bad ka kam tih dewïong ha Meghalaya”.

Ka la iathuh ba ha ka jingïalang la ïakren halor ki jingdonkam bad ki lad kiba lah ban pyntreikam ïa ka scientific mining ha Meghalaya, khamtam ha East Jaintia Hills.

Ka la ong ba ka kynhun jong ka Sorkar Meghalaya ka la ai ïa ka presentation sha ki ophisar jong ka Sorkar India, katba ka kynhun ka la ïoh ruh ïa ka presentation na ka CMPDIL.

“Ka kam ka la ïaid shakhmat bad ngi kyrmen ba lyngba kane ka jingïalang, ngin ïoh shuh shuh ïa ki jingtip na ki. Ngi la ai ïa ka presentation jong ngi bad ngi la ïoh ruh ïa ka presentation na ka CMPDIL,” ka la ong.

Katkum ka jingong jong ka, ki ophisar jong ka Sorkar India ki la pynpaw ïa ka jingsngew hun halor ka rukom kaba lah ban pyntreikam ïa ka scientific mining ha baroh kawei ka Meghalaya, khamtam ha East Jaintia Hills. La iathuh ba ki don ruh ka jingthmu ban wan jngoh ïa ka Meghalaya ban peit ïa ka rukom treikam jong ka scientific mining.

Ka Kong Santa ka la ong ba kane ka long ka jingïabuddien ïa ki jingpyrshang jong ka Sorkar Meghalaya ban pyntreikam ïa ka scientific mining, ha kaba ki ophisar ki dang trei shitom ban pynïaid ïa kane ka kam.

Ka la ong ba ka jingeh ha ka liang ka kamai kajih kaba ki paidbah Meghalaya ki ïakynduh ka long kawei na ki daw ba ka Sorkar ka dang trei shitom ban pynïaid shakhmat ïa ka scientific mining.

Ka la ong ruh ba haba ma ka bad u Myntri Rangbah ki la leit sha Delhi, ki la aiti ïa ka memorandum sha ka Sorkar India, ha kaba la pynpaw ïa bun tylli ki mat.

Kawei na ki mat kaba kongsan, ka la ong, ka long ban pynrit ïa ka jingheh jong ka scientific mining, namar ka open-cast mining kam long kaba lah ban pyntreikam ha Meghalaya namar ka rem dor bad ka lah ban wanrah ïa ka jingpynjot ïa ka mariang.

“Ka open-cast mining kam long kaba lah ban pyntreikam ha Meghalaya namar ka lut bun dor, bad kan wanrah ïa ka jingpynjot ïa ka mariang,” ka la ong.

Ka Kong Santa ka la pynpaw ïa ka jingkyrmen ba ka Sorkar India kan wan jngoh ïa ka Meghalaya bad ban peit hi ïa ki jingeh bad ki jingdonkam ha ka jylla, khnang ban lah ban rai ïa ka rukom ban ïaid shakhmat bad ka scientific mining.

“Ka Sorkar India ka long kaba kloi bha, lyngba ka jingïalam jong u Chief Minister, bad u dang bud bad pynbor ïa ki ban ïaid shakhmat. Ngi hangne ruh ngi don ban kyrshan ïa u ha baroh ki liang,” ka la ong.

Ka la ong ba ka tarik ba ki ophisar jong ka Sorkar India kin wan jngoh ïa ka Meghalaya la khmih lynti ba kan long ha u bnai Risaw.