Kyntait ki nongkyrshan NPP ia u Nelbi T Sangma kum u kyrtong, kynnoh ba leh ‘politik’ ki nongialam

Da ki hajar ngut ki nongkyrshan jong ka NPP Ranikor Block hapoh ka jingialam jong u Bah Mandilos Nongbri, kyrtong MDC barim ka NPP Ranikor Block mynta ka sngi ki la iamih paitbah ban pyrshah jur halor ka jingpynbna kyrtong MLA ia u President ka Block, u Nelbi T Sangma dang shen bad kynnoh ba kane ka dei tang ka buit politik jong u Nelbi, u Itchin D. Shira uba dei u Secretary ka Block bad u State Secretary ba dei peit ia ka South West Khasi Hills District, u Bah Kitborlang Nongrem.

Ha kane ka jingialang kaba la long ha Nongjri , South West Khasi Hills District palat hajar ngut ki nongkyrshan jong u bah Mandilos Nongbri bad ki nongialam ki la kyntait bad kim pdiang halor katei ka rai kaba la shim ha Rangthong.

U bah Mandilos Nongbri haba kren sha ki lad patai khubor u la ong ba ka jingkhot ïa ka jingialang ,ka long ban pyrshah jur halor ka rai kaba la dep ha kaba u Nelbi T. Sangma, President NPP Ranikor Block Unit u la rai ïalade kum u kyrtong MLA jong ka NPP ha u snem 2028.

U bah Mandilos u la ong ruh ba u Nelbi T Sangma ua la thok ïa ki piadbah namar ha katei ka sngi u khlem khot jingialang na ka bynta ban jied ïa u kyrtong, hynrei la khot ïa ka jingialang na ka bynta ban ïa pyrkhat ïa ki kam ha kaba ïadei bad ka MP election bad kiwei kiwei ki kam.

Shuh shuh u la kynnoh ruh ba u Block President u Nelbi T. Sangma, u Secretary u Itchin. D. Shira bad u State Secretary In -chagre jong ka South West Khasi Hills District u bah Kitborlang Nongrem ki la leh donbor da kaba ki weng noh ïa u na ka Whatapp Group jong ka NPP Ranikor ym tang kata ki ki khlem pyntip ruh ia ki nongkyshan jong u ha ka general meeting kaba la long ha ka 8 tarik ha Rangthong ha kaba ki la pynbna ruh da ka bor ia u kyrtong na ka bynta ka election 2028 khlem ka jing bthah ki bor bahalor jong ka seng .

“Ngim lah ban pdiag ïaa katei ka rai, ngi la phah jingthoh bad leit iaynduh ia u National President ka seng ha kaba iadei bad katei ka kam” ong u bah Mandilos bad u la iathuh ruh ba u Conrad Sangma u la pynthikna ha khmat jong u ba un nym pdiang ïa katei ka rai da kaba u la bynrap ruh ba katei ka rai kaba la shim ha katei ka sngi ka long pyrshah ïa ki kyndon jong ka seng namar na ka liang ka NPP haduh mynta kam pat rai ïa ki kyrtong ha baroh ki constituency ha kaba ïadei bad ka MLA election.

U Bah Mandilos u la la ai khublei ruh ïa ki nongkyrshan kiba la kyrshan ïa u ha ka MDC election, wat la u khlem poi sha ka thong hynrei u la ioh haduh kumba 10 hajar tam ka vote bad u la ong ruh ba kim don bynta eiei ban pynpait pynpra ïa ka party hynrei ki la rai ba kin ai ka jingkyrshan kaba skhem ïa u Dr. D.L. Nonglait.

U la ong ruh ba ha kane ka jingialang ki nongkyrshan bad ki nongialam party da kawei ka sur ki la rai ban pynsngew ha ki nongialam bahalor da kaba dawa ba dei ban bujli noh ïa ki nongialam ka Ranikor Block kata ïa u President u Nelbi T Sangma bad ia u Secreatary u Itchin D. Chira kiba don jingthmu ban pynpait pynpra ïa ka seng NPP ha Ranikor.