Ym don ba lah ban pynkhuid marwei ia ka shnong bad ka Jylla: Sniawbhalang

U Symbud Myntri Rangbah ka Jylla ba peit ia ka tnat Urban Affairs u Bab Sniawbhalang Dhar hynne ka sngi ula ong ba ym don mano mano uba lah ban leh marwei ban pynkhuid ia ka shnong ka thaw ne ia ka Jylla baroh kawei.

Ia kane u Symbud Myntri Rangbah ula kren haba shim bynta ha ka prokram pynkhuid paidbah ba la pynlong da ka Directorate of Urban Affairs hapoh ka Swachh Bharat Mission (Urban).

Kane ka prokram ka kynthup ïa ka jingpynkhuid ba 100 kilomitar, naduh Nongpoh haduh Sohra, kum shibynta ka prokram pynkhuid ia ka ri baroh kawei, ka Swachhata Hi Seva 2026.

Ia kane ka prokram la pynlong hapoh ka phang, “Ek Din, Ek Saath, Ek Ghanta” (Shi Sngi, Lang Baroh, Shi Kynta). Ha kane ka prokram ki la don bynta ki khynnah skul, ki kolej, ki Dorbar Shnong, ki seng bapher bapher, ki tnad sorkar bad kiwei kiwei.

U Symbud Myntri Rangbah u la ong ba ka Swachh Bharat Mission kam dei tang ka prokram pynkhuid hynrei ka dei ka jingkhih paidbah ba baroh kin don ka jingkitkhlieh ha ka imlang sahlang.

“Kane ka prokram ka thmu ban wanrah ïa ka jingkylla ha ka jingkhuid bad ka sawdong sawkun ha Meghalaya lyngba ka jingïashim bynta lang jong baroh bad ka jingkylla ha ka rukom pyrkhat jong ki paidbah,” u la ong.

Ula ong ba ka sorkar jylla ka wad ki lad ban pynkhlaiñ ïa ka jingïatreilang hapdeng ki tnad sorkar la ka long ha sor bad nongkyndong, ki samla, ki kynthei bad ki skul, khamtam eh ha Shillong, khnang ban pynkhlaiñ ïa ki kam pynkhuid.

Haba ban jur ïa ka jingdonkam ban pynlong ïa ka jingkhuid kum ka jingmlien, u Bah Sniawbhalang u la ong ba bunsien ki briew ki ju leh da ka rukom kaba pher haba ki leit shabar Meghalaya, namar ba ki jaka ki khuid bad ki briew ki don ïa ka rukom sumar kaba phikir ïa ki jaka paidbah.

U la ong ba ka sorkar ka kwah ban pynlong ïa ka jingkhuid kum kawei na ki kam ba ki paidbah ki dei ban leh man ka por. “Ka sorkar ka kyntu ïa ki paidbah ban shim ïa ka jingkitkhlieh ban sumar ïa ki surok, ki shnong, ki sor rit bad ki sor jong ki, ym ban iehnoh ïa kane ka kam tang ha ka sorkar.”

Haba kren shaphang ka jingpynkhuid kaba jrong haduh 100 kilomitar, u la ong ba kane ka dei ka nuksa jong ka jingïatreilang bad ka jingïashim bynta lang jong baroh. “Kane kan pyni ïa ka jingkut jingmut jong ka Meghalaya ban pynkhuid bad pynitynnad ïa ki jaka paidbah,” u la ong.

Haba kren shaphang ka jingpynïaid kam ïa ki ñiut, u la ong ba ki jaka kum ka Jowai, Tura bad Nongpoh ki dei napdeng ki jaka ba la pyrkhat ne ithuh ban tei ïa ki jaka bret ñiut. “Ka jingthmu ka long ban pynthikna ba ki sor rit bad ki sor ha kylleng ka Meghalaya kin don ïa ki jaka bret ñiut katkum ka juk mynta ha kine ki snem ban wan,” u la ong.

U la kyntu ïa ki paidbah ban ïa synran bad ïatreilang ha kaba buh ïa kine ki jaka, namar ba teng teng ki briew ki pyrshah ïa kine ki projek namar ka jingbym sngewthuh ïa ka jingmyntoi jong ki.

Ha kane ka prokram ki la donlang u Secretary jong ka Sorkar Meghalaya, u SC Sadhu, u CEO ka Shillong Municipal Board, u PK Boro, u BDO jong ka Mawlai C&RD Block, ki ophisar CRP; ki khynnah skul; ki nongshong shnong ka Mawlai-Mawiong bad kiwei kiwei kiba don bynta ha kane ka prokram.