Kiba ioh iakhun ilekshon tang ki riewlum, la pynhiar 18 snem na 21 ka rta nongthep vote

Ka tnad District Council Affairs ka sorkar Jylla ka la pynmih ka Notification ha ka Meghalaya Extraordinary Gazette ha ka 30 tarik Nailur halor ka jingpynkylla ia ki kyndon aiñ jong ka Garo Hills Autonomous District Council (GHADC) hadien ba u Lat ka Jylla ula mynjur ha ka 28 tarik u Nailur.

Katkum ka jingpynbna long ban pynthymmai ia ka Electoral Rules ia kaba u Lat u la mynjur ia ka Second Amendment jong ka District Council Constitution Rules, 2026 bad pynmih ha ka Meghalaya Gazette ba kynthup ia ki ar tylli ki jingpynkylla ba kongsan ba la dep Notify hapoh ka Rule 128 bad 129 jong ka Assam and Meghalaya Autonomous Districts (Constitution of District Councils) Rules, 1951.

Ka jingpynkylla ka kynthup ia ka rta ki nongthep vote bad ban iakhun ia ka ilekshon ha GHADC, ia ka rta ki nongthep vote la pynhiar sha ka 18 snem na ka 21 snem, kumta ha jaka ka kyntien “Ym duna 21 snem ka rta” la pynrung noh da ka kyntien “Ym duna ia ka 18 snem ka rta ha ka Qualifying Date”.

Kawei pat ka jingpynkylla ba kham kongsan ka long ba ki kyrtong ban iakhun ilekshon ha GHADC ki dei ban long ki jaidbynriew riewlum ne Scheduled Tribe kumba la kdew ha ka Constitution (Scheduled Tribes) Order, 1950 ka jylla Meghalaya.

Ia ka kyndon ba la don lypa hapoh ka Rule 128 lah weng noh bad la bsuh da ki kyndon thymmai.

Katkum ka jingpynkylla thymmai ia ka Rule 129, ka GHADC kan don la ka jong Electoral Roll ne ka thup kyrteng nongthep man ki ki constituency bad ia kane yn pynkhreh da ki Returning Officer katkum ki kyndon hapoh jong ka Rule 128.

Kine ki kyndon aiñ kiba thymmai kin treikam noh mardor bad kin treikam ha ka Garo Hills Autonomous District baroh kawei, la ong ha Gazette Notification.

Katkum ka jingpynbna ha Gazette Notification kine ki kyndon aiñ ba thymmai kin treikam noh mardor ka Garo Hills Autonomous District Council baroh kawei.