Ba ban ka jingduk, ym ju ioh lad ialehkai u kyrtong ka UDP

U nongsaid ain ba pawnam ka jylla uba dei ruh u kyrtong ka MP ka UDP, u bah Vivanstone G Kharngapkynta ula ong ba ha ka por ba u dang khynnah um ju ioh lad ban ioh ialehkai namar ba ka jingban ka jingduk.

Ia kane ula ong haba kren ha ka jingpynkut ia ka taiew lehkmen ka Raitong Christian Endeavour Society ka Narlien Mihngi Pastorate C.E. Union, Ri-Bhoi Sepngi Presbytery ka Ri Bhoi Presbyterian Synod kaba long mynta ka sngi ha madan Tdoh Umshaw, Raitong.

U bah Vivanstone ula ong ba watla ula ih bha ka rta hynrei ka dur ka dar jong u ka I samla namar ba um ju tih sikret, um ju dih kyiad, bad um ju bam kwai bad ula kyntu ia ki samla ban long kiba dissiplin ha ka jingim bad kyrmen ba ki samla thain Raitong kin mih kiban shakri ia ka thain bad ka dong bad ka jaitbynriew.

Kum u kyrtong ka UDP ha kane ka MP elekshon, u la kyrpad ia ki paidbah ym pynsep ei ia ka vote jongki ioh ba lashai ka sorkar India kam ithuh shuh ia ki nongshong shnong ka ri India.

U Vice President ka UDP u bah Allantry Dkhar ula ai mynsiem ia ki samla ba kin lehkai tista namar ka kam ialehkai kadei kawei na ka lad ban kamai jakpoh.

Ula ong ba u ruh ha ka por ba samla u ju smat ban lehkai bad mynta ruh u bat kum u General Secretary ka Hockey Meghalaya ha kaba mynta ki dang ialeh ban pynkhie im biang ia kane ka jinglehkai.

Ha kane ka sngi, la ioh ruh ia ka jingkren na u tymmen Basan u bah Akbar Rympeit, bad kiwei.

Ha kane ka sngi la pyllong ia ka jingialehkai siat nub, dieng redi, phutbol, kynthih ha kaba u kongsan u la sam ruh ia ka khusnam ia ki nongjop ha ka jingialehkai phutbol bad kiwei.