Ki nongshong shnong ka Laban Pyllun kiba pyrshah ia ka Shyllong Ropeway projek hapoh ka shatri jong ka Joint Action Committee Against Shyllong Ropeway hynne ka sngi ki la bitar bad mih jyndat na ka jingialang ba la khot da ka sorkar jylla ha State Convention Centre, Shillong.
Kane ka jingmih jyndat jong ki ka long hadien ba ki Rangbah shnong ki la pynshai bad ki la pynskan ba ki la dep pyllong ia ka Public Hearing ha u snem 2022. Katba ki nongshong shnong ki la kam ba kam shym la don ka jingpyrta shnong ban pyllong ia kane ka Hearing, katba ki Rangbah shnong kila kam ba ki la dep pynbna paidbah ha shwa ban pyllong ia kane ka Public Hearing.
Ki nongialam ka JAC haba kren sha ki lad pathai khubor, kila ong ba ka jingmih jyndat jong ki na ka jingialang ka long hadien ba ki Rangbah shnong kila shukor bad thok ba ka la don ka Public Hearing ha u snem 2022, hynrei kam shym la don ka hearing ha utei u snem.
“Ha ka jingialang ki Rangbah shnong kila thok bad ki la kam ba ki la phah ia ki Dorbar ban pynbna. Hynrei kaba sngewsih ka long ba ha ki 7 tylli ki Dorbar kam shym la don kano kano ka jingpynbna ban khot ia ka Public Hearing,” ong ka President ka JAC ka kong D. Marbaniang.
Ka la ong ba ki nongshong shnong ha kitei ki thain ba pyniaid ia ka Ropeway kim pdiang bad wan pynthut ia u Lum Shyllong bad la dawa ba ka sorkar kadei ban pynkynriah ia katei ka projek.
Ka Secretary ka JAC ka Dr.Linda Marbaniang ka la pynpaw ka jingsngewsih ba ki Rangbah shnong kila pynskan ba kiladep ban pyllong ia ka Public Hearing ha u snem 2022 bad la kynnoh ba lehse kadei ka Hearing shimet tang jong ki Rangbah Shnong kiba dei ki dkhot jong ka Riat Laban Pyllun.
“ Ngim pdiang ia kata ka Public Hearing namar kum ki nongshong shnong jong ka Riat laban Pyllun phim khlem leh haba shit ba shai ia ka Hearing. Ngi khlem iohsngew ia ka tonghung ba phi pynbna ha u 2022,” ong ka Dr. Linda.
Ha kajuh ka por, ka la ther ia ka sorkar ba ka kyntait ban khot jingialang ia ki nongshong shnong ka Lawsohtun, watla kane ka shnong kadei kaba don ha kjat jong u Lum Shyllong.
Ka JAC ka la kren shai ba ka sorkar kadei ban pyndam ia kane ka projek Ropeway bad ki Rangbah shnong ruh kidei ban pyndam noh ia ka soskular ba la iasoi bad ka sorkar.