Pynkup burom u MLA ia ki riew rangbah, ki samla pule bad nongialehkai

U MLA ka North Shillong Constituency u Bah Adelbert Nongrum hynne ka sngi u la ong, ba marwei ngi lah tang ban pynjot pynpra hynrei da ka jingiatylli ngi lah ban thaw dur bad ban saiñ dur ïa ka lawei jong ka Ri bad ka Jaitbynriew.

Ia kane u Bah Adelert ula kren ha ka prokram ba la pynlong da ka Organising Committee, 17-North Shillong Constituency ban pynkup burom ïa ki nongshong shnong ka Constituency kiba la wanrah nam ha ki jingpule, ki kam lehkai bad kiba la noh synniang ia ka imlang sahlang.

Ha kane ka prokram la ïa don bynta ruh da kiwei pat ki Jaitbynriew ki bym dei Khasi kiba hap hapoh ka 17-North Shillong constituency.

U Bah Adelbert ula ong ba u kynthup lang ïa ki hapoh ka imlang sahlang bad ba u khlem kwah ban don ka jingsngew ïapher Jaitbynriew hynrei ka jingiatylli para briew.

Ula ong ruh ba u ju kloi ban long kum ka jingkieng kaba pynïasoh ïa ki jaitbynriew bapher bapher, na ka bynta ban tei ïa ka jingïatylli bad ka jingsuk.

“Ngam lah ban pynïapher iwei ïa iwei pat, namar haba kut ngi dei hi ki jingthaw ki jong u Blei na kata ka daw nga ngeit ba ngin ïa ieid bad burom markylliang na ka bynta ka shongsuk shongsaiñ bad ka jingkhlaiñ jong ka Ri,” la ong u Bah Adelbert.

U Bah Adelbert ula ong ruh ba kane ka jingleh burom ka dei ka jingpynlong ban ïa ithuh, ban ai jingïaroh bad ban rakhe lang kum ki dkhot jong kawei ka longïing, da kawei ka sur.

“Ngam sngew dei ba ka pisa lane ka skhim kaba nga don lyngba ka sorkar Meghalaya bad lyngba ka sorkar India ba ngan pyndonkam tang ha ki kam pynroi. Hynrei nga sngew ki don kiwei pat ki bynta kiba nga hap ban pyndonkam kam ïa ka, na kata ka daw nga lum ïa kane ka jingïakynduh lang,” u la ong.

Ula pynpaw ruh ïa ka jingai khublei kyrpang ïa baroh ki nongioh nam ha kaba ula ong ba dei na ka daw ka jong ki bad la ïoh ban ialum lang ha kane ka sngi.

Ha kane ka prokram ka Organising Committee, 17-North Shillong Constituency Assembly kala ïoh ban ai burom haduh 400 ngut ki nongshong ba la Rangbah kiba la noh synniang ha ka imlang sahlang, 50 ngut ki samla pule ba wan shakhmat ha ki kyrdan pule, 30 ngut ki riew ïalehkai sport bad kiwei pat kiba la wanrah nam rah Burom ia ka konstitwensi bad ka jylla.