Ka ‘Gospel Concert’ KJP Assembly ha Polo ban pynmih pisa ia ki Project

Ka KJP Assembly lyngba ka Mission and Evangelism kan pynlong ia ka Gospel Concert kaba heh, kaba la ai kyrteng ka ‘Maverick City Music’ ha nongbah Shillong ha ka 12 tarik u Nohprah, 2026, ha Madan Polo, Shillong.

la kane ka concert la pynlong da ka KJP Assembly ha ryngkat ka jingkyrshan jong ka sorkar Meghalaya.

Haba kren sha ki lad pathai khubor, u Rev. S Diengngan ula ong ba ka jingpynlong ia kane Concert ka long na bynta ban pynmih pisa na bynta ban kyrshan ia ki project bapher bapher jong ka KJP Assembly kiba kyntiew ia ka imlang sahlang bad ka bha ka miat jong ki briew ha ka jylla.

Ula Rev. Diengngan ula ong ba ka Maverick City Music ka dei ka kynhun nongrwai Gospel kaba pawnam na Atlanta, Georgia, USA, kaba la paw nam bha ha ki bynta bapher bapher jong ka pyrthei lyngba ki jingrwai mane bad jingiaroh ia U Blei.

“Kane ka long ka lad ban sakhi ia kine ki nongrwai Gospel na shabar ri hapoh kane jylla hadien ki nongrwai bad ki kynhun Gospel kiba la paw ha ki por mynshwa, kum u Bob Fitts, ka kynhun tem Petra bad u Don Moen, mynta ngi don ia ka kabu ban sakhi sa shsisien ia kane ka kynhun nongtem nongput kaba pawnam jong ka pyrthei ka Maverick City Music,” ong u Rev. Diengngan.

Ula pynpaw ka jingkyrmen ba lyngba kane ka concert, kan long ka kabu kaba kyrpang ia ki paidbah ban iashim bynta ha ka jingiaroh ia U Blei lyngba ka jingrwai bad kumjuh ruh ia ka sap rwai sap tem jong kine ki nongrwai.

“Ka jingthmu jong kane ka concert kadei kum shibynta na ka jingpynkhreh ka jong ngi ia kane ka aiom Khristmas bad ruh ban kyntiew ia ka sap ka phong jong ki khun ka jylla ka jong ngi ha ka tem ka put khristan. Kawei pat ka jingthmu kaba kongsan ka long ban pynmih pisa na ka bynta ban kyrshan ia ki kam bad ki project jong ka KJP Assembly kiba shakri ia ka imlang sahlang. Ka KJP Assembly ka don ia ki project bapher bapher kynthup a ki kam jingiarap ia kiba donkam jingiarap ha ki kam pule puthi, ka jingsumar bad jingiarap ha ka liang ka koit ka khiah, bad kiwei pat ki kam kiba thmu ban wanrah ia ka jingkylla kaba bha ha ka imlang sahlang,” ong u Rev Diengngan.

Na bynta kane ka Concert, ki dor tiket ki long T. 1,000, T.1,500B bad T.2,500. Ia ki tiket lah ban ioh lyngba ka ROCKSK TICKETS.COM.