Bitar kiba naRiwar Pynursla ba thurmur phah siew bai Bording ka MeECL

Ki paidbah nongshong shnong ka Umniuh Tmar bad kiwei ki shnong na thain Riwar Pynursla kila pynpaw ka jingbitar jur daka ba kynnoh ba ka long thurmur ka rukom phah siew bai Bording ka MeECL. Katkum ka jingiathuh ki riew rangbah, ka ophis u SDO ka MeECL Pynursla, ka la phah shithi sha trai iing ka shnong Umniuh Tmar bad kiwei ki shnong ba kin siew ia ka bai thang ding  kaba dei jong u snem 2015-2016, bad ki don kiba ka MeECL ka phah siew haduh T.10 hajar haduh T.25 hajar. Kane ka jingleh ka ophis SDO MeECL Pynursla ka wanrah ka jingkyndit ia ki paidbah namar ba kila dep siew tista ia ka bai thang ding khlem pynsah satia.

Naka liang u Sirdar ka Umniuh Tmar u Bah Nanglamlad Khongshah u la iathuh ba u la lum ia ka jingialang ki nongshong shnong halor kane bad ki la rai ba un leit mih sha ka ophis ka MeECL ha Pynursla ban iakren bad lada jia ba ka kam, kam iaid kumba kila thmu, kin sa shim da kiwei ki lynti.“Ki nongshong shnong ka Umniuh-Tmar Elaka kila khie bitar jur hadien ba kila ioh shithi ban phah siew ia ka bai thang ding kaba la dep. Ka jingialang hynnin ka sngi, la rai ban phah leit mihkhmat u Sirdar sha ka ophis MeECL Pynursla halor kane bad lada kam sngap ia ka jingiaknren, ki paidbah kin iaid shakhmat” u la ong.

U Sirdar u la ong ruh ba la ioh jingtip ba kum kane ka jingjia, ka don ruh ha kiwei ki shnong ka thain ha kaba ki briew kiba duk kila kyndit kumba iuh tdong bsein haba ka poi ka shithi na ka MeECL ba kin hap siew ia ka bai thang ding kaba la kot da ki hajar bad phew hajar wat haba ki la dep siew sha u lum ha kitei ki snem. U la kam ba wat ki skul ruh ki ioh ia kane ka shithi na ka MeECL, kaba la pynshaiong ngain ia ki paidbah.