Thang bad pynkylla dpei ka sorkar ïa u drok ba shongdor T.53 klur

U Myntri Rangbah ka Jylla Conrad K Sangma, ryngkat bad u Symbud Myntri Rangbah ka jylla u Bah Prestone Tynsong, hynne ka sngi Palei, kila iashimbynta ha kaban thang bad pynkylla dpei ia u drok uba shongdor T.53 klur uba la ioh kurup na kylleng ki bynta jong ka jylla Meghalaya. Ia une u drok la thang ha Star Cement Ltd kaba don ha Lumshnong, East Jaintia Hills District ha kaba la donlang ka myntri ka koit ka khiah ka Kong Ampareen Lyngdoh, ka Director General of Police ka Kong Idashisha Nongrang bad kiwei kiwei ki heh Sorkar. Ha kane ka sngi, ka thang ia ki drok katkum ki kyndon jongka Narcotic Drugs and Psychotropic Substances (NDPS) Act ban pynthikna ba kan don ka khuid ka suba da kaba bud rytnih ia ki kyndon ain. La thang ia u drok uba shongdor T.53 Klur kaba kynthup ia u Heroin uba shongdor T.23.98 Klur, u Ganja uba shongdor T.7.6 Klur bad u Crystal Methamphetamine uba shongdor T.21.3 Klur.

Haba kren ha ka jingialang, u Myntri Rangbah ula banjur ia ka jingkut jingmut jong ka Sorkar Jylla ban pynduh jait ban iakhun thma pyrshah ia u drok.”Ka jingpynduh noh ia u drok mynta ka sngi ka pyni ia ka jingtrei shitom kaba khlem shongthait ban iakhun pyrshah ia ka jingpyndonkam bad ka jingkhaii ia u drok ha Meghalaya. Kane kadei ka khubor kaba khlain sha ka imlang sahlang ba ngi shimkhia bha ia kane ka jingiakhun bad ngin bteng ban shim ia ki rai kiba kongsan” la ong u Conrad.U Bah Prestone Tynsong ula ai khublei ia ka tnad Pulit bad ia kiwei pat ki tnad kiba donkti kiba la pyni ia ka jinglah ka jongki ban treikam.

“Ki pulit hapoh ka jingialam jong ka DGP, kila leh ia kakam kaba khraw.Kane ka prokram kadei ka nuksa jong ka jingiatreilang jong baroh kiba iadobynta ban pynduh jait ia u drok ha ka jylla” la ong u Bah Prestone. Ka Idashisha Nongrang, kala pynthikna ia ki paidbah ba kan don ka jingtreikam kaba khuid ba suba ha ka jingthang ia u drok bad la iaid bin pa bin da kaba bud ryntih ia ka ain bad ia ki kam ki jam baroh lah leh la buh ha ki jingthoh bad ban pynneh ia ki jingkhein jingdiah kiba thikna.