Phla ka longkmie ba wanpoi ki nongtrei sorkar ha ka jingbuaid, takrain u Myntri Rangbah

U Myntri Rangbah ka Jylla, u Conrad K. Sangma ha ka Sngi Thohdieng u la hiar sha Ranikor, South West Khasi Hills District ban iashimbynta ha ka Block Level Community Interaction Program kaba la pynlong lyngba ka prokram CM-Connect ban sngap bad iamir jingmut halor ki jingeh ba ki paidbah kane ka thaiñ ki iakynduh. Ki mat kum ka jingiakajia hapdeng ki briew bad ki hati, ka jingbym don ki surok, ka jingnbym ioh um, ka jingbym ioh bor bording, ka jinghiar ha ka jingpynmih ia ki mar rep, ki kam jngohkai bad ka jingduh ia ki skhim sorkar pdeng namar u adhaar ki la long ki katto katne ki mat ba la iakren ha kane ka prokram. Ha katei ka prokram, ka jingshah thombor kaba man ka por ha ki hati khlaw ïa ki jingthung jingtep bad ki ïing ki sem ha ka thaiñ Ranikor ka la long kawei na ki mat ba la iatai sani hadien ba kawei ka longkmie na ka shnong Mawpyllun ka la kyrpad ïa u Myntri Rangbah ka jylla ban tuklar lem halor kane ka kam namar ba ki hati khlaw ki la sah ha katei ka thaiñ mynta la palat ar snem. Na ka liang jong uwei u heh ophisar u la pyntip sha u Myntri Rangbah ba ki la dep thaw ia ka Quick Response Team ban iarap kloi tang shu ioh jingtip shaphang ka jingshah thombor ha ki hati, hynrei katei ka longkmie ka la pyntip ba kam shym la long kumta namar ba ka la shimpor da ki sngi ym tang da ki kynta ia ki nongtrei sorkar ba kin wan poi lada pyntip halor ka jingwan thombor ki hati, bad haba ki wan ruh ki wan ha ka jingbuaid khawiang.

Hadien ba la iohsngew ia katei ka jingujor, u Myntri Rangbah u la khot ia u Nongstoin Range Officer bad u la kylli ia u, “Hato phi phah da ki briew kiba buaid? Kane ka long ka bym lah ban pdiang satia. Ban pynslem ka long da kumwei, hynrei ban leit ha ka jingbuaid ka dei kaei kaei kaba ngam lah ban pdiang. Ka don ka por ban dih bad ka don ka por ban trei. Kane ka long ka kam iap kam im jong ki paitbah. Kumta, dei ban pynshitom ia kiba kum kita kiba buaid”. Da ka jingpyntip jong ki paidbah ba ki hati ki la sah ha katei ka jaka la palat ar snem mynta, u Myntri Rangbah u la bthah ïa ki heh ophisar ba kin ai jingkyrshan mardor ïa ka kynhun ka Nongstoin khnang ba kin lah ban tehlakam ïa kane ka jingiakajia namar kane ka dei ka kam kaba khia bha kaba la buh ia ki paitbah ha ka jingsyier bad sheptieng. Da kaba shim kabu ia kane ka prokram, uwei u nongshong shnong na Nongnah u kylli jingkylli ia ka sienjam ba la shim da ka sorkar na ka bynta ban kyntiew ia ka kam jngohkai pyrthei ha katei ka thain bad u Conrad u la pyntip ba ka sorkar jylla kan sa khot tender noh na ka bynta ban tei ia kawei ka Resort ha Nongnah ha ka jinglut kaba la kumno kumno T.30 klur, bad kumuuh ruh ka la mynjur ban shna ia ka surok bad kawei ka jaka peitkai ha katei ka jaka.

Ki nongshong shnong na ka shnong Phlangdiloin ki la pynpaw ia ka jingeh kaba ki paidbah katei ka thain ki iakynduh namar ka jingbym don surok na Phlangdiloin sha Ranikor ha kaba ki la hap ban iaid kjat kumba 2 kynta eiei. U Conrad u la ong ba kane ka dei ka projek kaba heh bha namar kane ka surok ka hap ban iaid lyngba ia ka Wah Rilang, hynrei u la kular ia ki paidbah ba un sa peit bniah ia kane ka kam. Ki nongrep na ki shnong bapher bapher ha kajuh ka por ki la pynpaw ia ka jingsngewsih halor ka jinghiar jong ka jingpynmih mar rep bad ki la pan jingïarap na u myntri rangbah, ha kaba u la ong ba ki nongrep ki lah ban shim kabu da kaba pyndonkam ia ka CM Farm Plus ban ïoh jingkyrshan. Ha kane ka prokram la iadonlang ruh ka Myntri ka koit ka khiah ka Kong Ampareen Lyngdoh, ki MLA ka Ranikor bad Mawkyrwat, kata, u bah Pius Marwein bad u Bah Renikton L Tongkhar bad kumjuh ki heh ophisar na ki tnat treikam bapher bapher.