Thaw ka Sorkar ia ka ‘Pla Tangka Cooperative Society’ ban iarap ia ki SHG ki Longkmie

Ka Kynhun Myntri hynne ka sngi ka la mynjur ruh ban pyntreikam ia ka Pla Tangka Cooperative Society (PTCS) na bynta ki kynhun Self Help Group ki Longkmie ban pyniar ia ka jingsengkam ha ki shnong ha ki thain nongkyndong. U Myntri Rangbah ka jylla u Conrad K Sangma haba iakren bad ki nongthoh khubor ula ong, ba ka jingdon ki SHG ka la kiew na ka 4000 tylli ha u snem 2018 sha palat 51,674 tylli mynta bad ka jingdon ki dkhot ka la kiew na ka 30,000 ngut sha ka 5.2 lak ngut ki kynthei. Ula ong, ba ka jingpyniaid pisa jong ki SHG ka la kiew na ka T.40 Klur sha ka T.1000 Klur.

U Conrad ula ong, ba la jer kyrteng Pla ha ka ktien Khasi bad Tangka ha ka ktien Garo bad kumta ka Pla Tangka Cooperative Society, kan treikam kum ka nongbei tyngka ia ki SHG, ba kin lah ban kynshew ia ka pisa bad shim ia ka ram ka shah kaba long haduh 10 sien na kaei kaba ki kynshew khlem da donkam ban iaid ia ki kyndon kiba bun jait kumba long ha ki Bank. Ula iathuh ruh ba ka jylla Meghalaya ha ryngkat bad kiwei pat ki jylla ha ka ri India kiba kynthup ia ka Rajasthan, Andhra Pradesh bad Telangana kidei kiba la sdang ia kum katei ka Cooperative Society.

U Myntri Rangbah ula ong ba kane ka Cooperative Society kam dei ka Bank, hynrei kan ai ka jingshakri ha ka liang ka pisa pilain kaba la pynwandur kyrpang tang na ka bynta jongki SHG. Ula ong ba ka jingshim ia kane ka sienjam kan pynkhlain ia ka jingsengkam sengjam ha ki jaka nongkyndong bad kyntiew ia ka ioh ka kot ha ka jylla.