Shah kem u nongkhaii drok ha Mawtnum ba thmu wan shalan drok ha Shillong

Ki pulit ka Ri Bhoi District, na ka jingiai bteng ban iakhun pyrshah ia u drok, hynnin ka miet hadien ba la pynap shrip bha ki la ioh ban kem ia u wei u briew na Assam u ba dang thmu ban leit shalan drok heroine sha nongbah Shillong. Ia u ne u briew u ba la kem noh da ki pulit ka Ri Bhoi District halor ka jingkynnoh donkti ban shalan ia u drok heroine, la tip kyrteng kum u Rajat Paul bad la ioh kurup ruh kumba 36.3 gram u drok heroine na ka met jong u. Katkum ka jingiathuh da u Superintendent of Police ka Ri Bhoi District, u VS Rathore, u la iathuh ba ki pulit kiba la nang treishitrhem ban pynduh jait ia u drok, hadien ba la ioh jingtip halor ka jingthmu shalan drok da u nong Assam sha nongbah Shillong, ki la pynlong ia ka jingpynap shrip ha kawei ka jaka hajan ka shnong Mawtnum ha u surok bah National Highway 06.

La iathuh ruh, ba hadien katto katne por ki pulit ki la ioh bat ia kawei ka kali tourist bad ha ka jingtalasi ki la iohkem ia u tei u briew bad ruh ia u drok heroine u ba dang thmu ban leit shalan sha nongbah Shillong, na ka liang ki pulit ki la pynngat ia u katkum ka kyndon ain jong ka NDPS Act 1985.

Shuh shuh ruh, u la iathuh ba ka tnat pulit ka Ri Bhoi District kan nym sangeh ban iai bteng ia ka jingtreishitom ban rad dyngkhong ia u drok u ba la kynrei bha ha kane ka jylla Meghalaya khamtam ba ka Ri Bhoi District ka dei ruh ka khyrdop kaba kongsan.