Iakynduh u MDC ia u enjiniar PWD ban maramot surok Lawsohtun

U MDC ka Laban Constituency u Bah Ricky Shullai, hynne ka sngi ula leit iakynduh ia u Executive Engineer ka PWD (Roads) Shillong Central Division Bah S Lytep, ban dawa ban shna noh mardor ia ka surok ba la sniew ha Lawsohtun. U Bah Ricky Shullai tang hadien katto katne sngi ba ula long kum u MDC jong ka Khasi Hills Autonomous District Council (KHADC) ula shimkhia mardor ia ka jingeh jongki paidbah ka Lawsohtun bad ula leit iakynduh ia u EE u Bah S Lytep ban pynsngew ia ka jingsniew jong ka surok bad na ka liang une u heh ka tnad PWD ruh ula kubur ba katei ka surok ha Lawsohtun kala sniew.

Haba iakren bad ki nongthoh khubor, u Bah Ricky ula ong, ba ula kyntu ia u Bah Lytep, ban sdang noh ban maramot bad ban pyndap ia ki thliew ha ka surok kiba la sniew khamtam haba ka aiom Lyiur ruh kala jan bad yn sa slap jur. “Nga dap da ka jingsngewtynnad ba u EE bad ka sorkar jylla kila shimkhia bad kila shim ia ka rai ban bhah ia ka pisa na ka bynta shna pynbha bad shna thymmai noh ia katei ka surok kaba la sniew bad la khmih lynti ba ha kane ka mang tyngka jong une u snem yn sa pyllait noh ia ka pisa ban sdang shna noh ia katei ka surok” la ong u Bah Ricky.

Une u MDC bathymmai ka Laban-Mawprem ula ong, ba watla katei ka khubor kaba ula ioh ka long kaba sngewtynnad hynrei un iaid buddien pat ia kane ka kam khnang ba kan long ka jingmyntoi ia ki paidbah.   Nalor kane, ula ong ba yn leit iakynduh ruh ia ki nongailam shnong khamtam haba bun kila sdang ban sait kali ha ka surok kaba don ha ka thain ‘Farm’ bad lada kane ka iai bteng, ka surok kan sa sniew lut bad kan buh ha ka jingeh ia ki paidbah kiba leit ba wan na katei ka surok lada ym don ba shimkhia noh.