Pynlut ka sorkar T.97.68 lak ban shna 3230 tylli ki pung dohkha

U Myntri Rangbah ka jylla u Conrad K Sangma ula pyntip ba ka sorkar ka la shna 3230 tylli ki pung dohkha ha u 2020-2024 ha ka jingpyllut kaba la kot sha ka T.97.68 lak. Haba jubab halor ka jingkylli ba la wanrah da u MLA ka VPP na Mawryngkneng u bah Heavingstone Kharpran, u Myntri Rangbah ula ong ba ka sorkar ka la pyllut T. 9768.29394 na bynta ban shna ia ki pung dohkha ha ka jylla ha ki saw snem naduh u 2020-24.U Myntri Rangbah ula iathuh ruh ba ka jylla ka donkam dohkha haduh 32 hajar metric ton bad mynta ka jylla ka la lah ban pynmih dohkha 20 hajar metric ton na lade bad 12 hajar metric ton ka dang hap ban ap na kiwei ki jylla ban pyndap ia ka jingdonkam dohkha ha kane ka jylla.

Ula pyntip ruh ba la don 61 tylli ki pung pynkha symbai dohkha kiba pynmih 24.7 million tylli ki symbai dohkha bad yn sa pynmih sa 35 tylli ban pyllut T. 10 klur. La buh ruh ia ka karkhana shna jingbam 15 tylli kiba pynmih 778 ton hynrei kane kam pat lah ban pyndap bad sa 12 tylli ki jaka shna jingbam dang pynkhreh.“Ka Sorkar Jylla kala mang  sa T.10 Klur na bynta ban tei ia ki 35 tylli ki jaka pynkha symbai dohkha,”ong u Myntri Rangbah ka jylla u Conrad.

Ha kajuh ka por u Conrad ula iathuh  ba ki don ar tylli ki skhim kawei na ka sorkar pdeng ha ka jingiarap kaba 60 percent ka subsidi bad 40 kum ka ram katba na ka skhim ka sorkar jylla, ka jingiarap ka long 60 percent ka subsidi bad 25 percent na ki nongrep bad 15 percent ka ram.Ula ong, “ Na bynta 1 akar, la mang 16 lak na ka skhim ka sorkar jylla bad 12 lak na ka skhim ka sorkar India.”