Shon dur ïa kiba bret pathar jaboh ha khyrdop Marten:SSMP

Ka Seng Samla Mawlai Pyllun (SSMP) hadien ba ka la ioh ia ka jingujor na ki paidbah Mawlai, khamtam na ki nongshongshnong ka Nongkwar Block-13 ka pynpaw ia ka jingsngewdiaw kaba jur bha halor kane ka jingkhlem akor bad lehsih ki briew kiba bret pathar ia la ki niut na ki iing bad na ki dukan jong ki ha shi lynter ka surok bah shwa ban poi ka khyrdop ka Marten. Ka Seng hadien ba ioh ia kine ki jingujor ka pynrem jur ia kito ki briew ba khlemakor la ki dei ki riewspah ne baduk, ki nongkhaïi doh ne dohkha, ki snep dohkha, snier bad snep syiar kiba wan bret pathar ia ki niut, ki ksew, ki miaw ba la iap la pyut, ki snep masi ki doh pyut da ki kali, ka long pynban ka jinglehrain iaki bahala iing ne ha dukan ki leh khuid, katba tang kaba lait nangta, kaba mut shabar na la iing ki dei kiba leh sih, shu bret pathar sha ki jaka bym dei.

Ka seng ka pynpaw ba ki la ioh jingujor ruh ba don ki briew kiba wan da ki kali remdor kiba pynlang ñiut ha ki plastic ynda la poi ha kine ki jaka (Area) ryngkat ka her stet ka kali shu kawang ia ki nuit sha kine ki jaka. Ka seng ka wer ia ki paidbah nongshongshnong kumjuh kiba iaid na kine ki bynta la ka dei kiba shu iaid kjat ne da ki kali ba kin sngewbha ban kem  ne shondur iaki briew ne kali  number plat ia kiba bret niut pathar ban dain kuna kaba heh nangne shakhmat ne pyntip sha ki nongialam shnong ne sha ka Seng.

Ka Seng ka kyntu ruh ia ki bor ba dei peit iaka Marten, kata ka Shillong Municipal Board ba kin buh noh da ki CCTV ha kine ki bynta khnang ban lah ban iohkem ia ki riewkhlem akor.” Ka  long kaba isaitmet bad ka jingpynrem kaba khraw ia kito ki briew kiba nang tang ban lehkhuid, lehstai, deng tai, dengksiar, don kali rem dor katba iaka niut na iing la shu bret sha surok tangba la lait na ing”, ong u Samla Eddiewigh Majaw, General Secretary ka SSMP ha ka kyrwoh jong u.