Ki kynthei ki nongiada bad ki nongpynroi: Ampareen

Ka tnad Social Welfare ryngkat ka jingiatreilang bad ka Meghalaya State Rural Livelihood Society hynne ka sngi ka la rakhe ia ka sngi burom kyrpang ia ki kynthei ha State Convention Centre, Shillong. Haba kren ha kane ka sngi u Myntri ka tnad Social Welfare ka jylla u bah Paul Lyngdoh ula ong ba ka tnad Social Welfare ka la pynkylla dur ia kiba bun bah ki longiing kiba kynduh jingeh ha kiba bun ki liang. Ula pynpaw ia ka jingsngew sarong ba ki briew nabar jylla ki phai khmat ia ka jylla Meghalaya haba ia dei bad ki kynthei bad kane ka dei ka burom kaba khraw ia ka jylla. Ula ong ba kum u Myntri sorkar ba dei peit ia ka tnad Social Welfare, u long u kpa jong ki 4 lak ngut ki khynnah kiba peit ha kane ka tnad.

“Ki briew ki tip ia u kum u kpa jong uwei u khun shynrang hynrei nalor jong nga, don 4 lak ngut ki khynnah ha ka jingpeit ka tnad Social Welfare bad ban long u kpa jong 4 lak ngut ki khynnah kam long ka kam kaba suk”. Katba na ka liang ka myntri ka tnad ka koit ka khiah ka jylla ka Kong Ampareen Lyngdoh, ka la ong ba ki kynthei ki iada ia ka kur ka jait ha ka jaitbynriew Khasi-Jaintia bad Garo kiba shim jait na ka kmie. Ka la ong ba ki kynthei ha kane ka jylla kim dei tang ki nongiada ia ka kur hynrei ki nang pynroi ruh.

Ka kong Ampareen ka la ong ba ka don ka jingsngew tieng ba lada ka kynthei ka trei kam ka lah ban ym ioh por ban sumar ia ki khynhun hynrei kane kam dei kumta, bad kane ka juk ka la plie lad ia ki kynthei ki nang ban bate ia ka por ha ka rukom kaba paka. Ka la ong ba ki khun ha kane ka juk ki donkam ia ki kynthei ban btin lynti na ka bynta ka lawei jong ki. Ha kum kane ka sngi, ka pyrthei baroh ka dei ban ai khublei kyrpang ia ki kynthei.