Palat 12 snem la iaid ka jingdawa ILP

Ka Khasi Students’ Union (KSU) hynne ka sngi ka la rakhe ia ka jingdap 47 snem ka jingiaid lynti jong ka seng naduh ba seng ha u snem 1978.
Ia kane ka jingrakhe ka KSU ka la pynlong hakhmat u mot sah nam ka seng hajan ka ophis jong Meghalaya Board of School Education (MBOSE), Lachumiere.
Haba kren ha kane ka sngi, u President ka KSU u bah Lambokstar Marngar ula pynkynmaw ia ki mat ba ka seng ka la shim ha kine ki 47 tylli ki snem na bynta ban iada ia ka ri bad ka jaidbynriew.

U bah Lambokstar ula ong ba kine ki 47 tylli ki snem jong ka jingiaid lynti ka seng, kam dei na bynta ka nam ka burom hynrei ka dei na bynta ka jingshong shgain ka jaidbynriew bad ban long trai halor ka khyndew ka shyiap.

Ula ong ba kawei na ka mat ba ka seng ka ieng radbah haduh mynta ka long ban dawa na ka sorkar ba ka dei ban pyntreikam ia ki ain na bynta ban iada ia ka jylla na ka jingwan rung khyrtlep ki briew ba nabar.

“La 12 snem ka seng ka la dawa ia ka Inner Line Permit (ILP) hynrei haduh mynta ka sorkar ka pyrshang ban rieh tngen ha ka sorkar India,” ong u President ka KSU.
Ula ong ba katba ka seng ka dang iakren ban wanrah ia ki ain ban iada ia ka jaid bynriew, hynrei ka sorkar ka kwah pynban ban wanrah da ka lynti rel ha kane ka jylla.
U President ka KSU ula ong ba ka sorkar kam dei ban ai ding ia ka KSU namar ka jingkwah ka seng ka long ban pyntreikam ia ki ain ban iada ia ka jaidbynriew bad lada ki pyrshang ban thombor ia kaei kaba ka seng ka ieng pyrshah, kin nym shongkli kti hynrei ki long kiba la kloi ban mih shakhmat ban shim ia ki sienjam ba tyngeh bad ki long kiba la kloi ban leit sha along ruh.
Ha kane ka sngi la ioh ruh ka jingkren na u General Secretary ka seng u samla Donald V Thabah, u Organising Secretary u samla Raymond.
Ha shwa kane ka seng ka la pynlong ruh ia ka jingsngap jar kaba shi minit kum ka dak ban kynmaw ia ki dkhot ka seng kiba la len lade na bynta ka jaidbynriew.