Ban pynheh kad liengsuin Umroi

a Sorkar Jylla ka dang ialeh ban ioh 16 akar ka jaka na ki riew shimet bad 6 akar na ka tnat Defence na ka bynta ban pynheh ia ka surok (Runway) ban her ki lengsuin na Umroi Airport. Lah ban kdew ka Sorkar Meghalaya ka la dep Sorjamin (Survey) ia ka Kad Lengsuin Umroi na ka bynta ban pynheh ia ka Kad Lengsuin ban lah ban iaid ki Lengsuin ba kham heh. Ki tyllong khubor ki ïathuh ka Sorkar Jylla ka donkam ka jaka ym duna 22 akar khnang ban lah ban pynjrong ia ka surok (Runway) haduh 2400 akar ban lah ki liengsuin ba heh ban hiar bad kamai na Umroi Airport. “Na ki riewshimet ka Sorkar ka donkam kumba 16 akar bad na ka tnat Defence kumba 6 akar katkum ka kaiphod jong ka Survey ba nyngkong” la ong ki tyllong khubor.

Haba iadei bad ka bailutksan jaka, ki tyllong khubor ki ïathuh ba katkum ka kaiphod jong ka Survey banyngkong, ka Sorkar Jylla kan hap lut T.70 haduh T.80 klur tang ban siew bailutksan ia ki trai jaka.  La ïathuh ha ka 24 tarik mynta u bnai, ka Sorkar Jylla kan shong jingialang ban shim rai, kumno ban iaid shakhmat haba ia dei bad ka jingshim jaka.”Watla ka jingshim jaka kam pat sdang hynrei ka Sorkar ka la thoh sha ka tnat Defence ban ioh jingbit ban sdang noh ia ki ban pyniar ia ka surok (Runway) jong ka Umroi Airport” la ong ki tyllong khubor.

Dang shen u Symbud Myntri Rangbah ba khmih ia ka tnat Transport u Bah Sniawbhalang Dhar ula ong ba ki Lengsuin ba kham heh kin sdang kamai noh na Umroi Airport ha shuwa ban kut u snem 2026. “Ka jingpynheh ia ka Umroi Airport kan wanrah ia ka jingkylla hapoh ka Jylla baroh kawei khamtam ha ka tnat Tourism namar ki Lengsuin ba kham heh kin lah ban sdang kamai, na Umroi sha Mumbai, Delhi, Bangalore bad kiwei ” u la ong.