Sha u DC ai jingthoh ka shnong Mawpun, ka jingshna surok 4 lane kam dei ban

Da ka jingsngewkhia ioh mih kano kano ka jingshah ktah ia ki tyllong Umdih Umbam na ka jingtei ia u surok Fourlane lane u Over Speed Corridor mynta ka sngi, ki nongialam ka Dorbar Shnong Mawpun Kshaid ki la leit syndon ban ia kynduh ia u Deputy Commissioner ka Ri Bhoi District bad ban buh ruh da ka dorkhas ban pyntikna ba ka jingtei ia u ne u surok kan nym don kano kano ka jingktah ia ki tyllong Umdih. Ki nongialam shnong ka Mawpun Kshaid, ba lamkhmat da u Rangbah Shnong Bah Bandari Ryntathiang, lem bad u Bah Synrap Nongrum, Secretary ha ka jingsynranlang ruh da ki dkhot shnong ki la kynduh bad aiti da ka dorkhas ha u DC u Abhilash Baranwal.

Na ka liang u Bah Bandari Ryntathiang, u la iathuh, ba ka jingiakynduh ia u DC ka Ri Bhoi bad ban aiti ruh da ka dorkhas kam shem mut ba kum ka shnong ka pyrshah ia u tei u surok Fourlane hynrei ka mat kaba kongsan hi ka long ba u ne u surok um dei pat ban ktah ia ki tyllong Umdih kiba bsa um ia ki nongshong shnong mynta da ki phew phew snem. U la iathuh ruh, ba ha ka jingiakynduh jong ki nongialam shnong bad ki riew shemphang jong ka kompani kaban tei ia u tei u surok Fourlane, u ban iaid lyngba u lum Sohpetbneng, u la pyntikna ba u ne u surok un don ka jingjngai kumba 140 meter eiei na ki tyllong Umdih, hynrei watla katta na ka liang ka shnong hi ka kwah da ka jingthoh bad jingkular kaba shit kaba shai ba ka jingtei ia u ne u surok kan nym ktah pat ia kine ki tyllong Umdih ha ki snem kiban sa wan.

Shuh shuh ruh, u la pyntip ba ha ka jingiakynduh bad u DC, ki nongialam shnong ki la ioh ia ka jingkular ba ki bor district kin sa khmieh bniah halor ka jingtei ia u ne u surok Fourlane ban nym don satia kano kano ka jingshah ktah ki tyllong Umdih bad lada don ruh yn sa pynsangeh shwa ia ka jingpyntrei ia u ne u surok.