Sahteng ki Project ban tei skul bad Kolej

Ka tnat Pule Puthi ka Sorkar Jylla hynne ka sngi ka la shong pyrkhat halor ka jingpyntrei ia ki jingtei ha ki skul bad ki College kba dang sahteng ha Jylla. Ïa kane ka jingïalang la khlieh da u Myntri ka tnat Pule Puthi u Rakkam A Sangma ha ka jingdonlang u MLA ka Mawphlang constituency u Bah Beyondstar Kurbah lem bad ki heh ophisar ka tnat. Haba kren sha ki lad pathai khubor hadien ka jingïalang u Rakkam ula ong, ha ka jingïalang, la ïakren sani halor ka jingslem ban pyntrei ia ki jingtei ia ki skul bad College khamtam ba ia dei bad ka Science & Commerce College ha Mawphlang, Mahendraganj, Patharkhmah bad Rongjeng. U Rakkam ula ïathuh ba la ïakren ruh halor ka jingpyntrei ia ka DIET ha Williamnagar, ki Polytechnic ha baroh ki District kynthup ha East Garo Hills, South Garo Hills, West Jaintia Hills, Ri-bhoi District, West Khasi Hills, ha kaba la bthah iaki ophisar bad iaki Contractor ban kham pynsted ban pyndep iaki kam.

“Lyngba ka Mission Education, ka Sorkar ka la mang pisa ban maramot ïa ki palat 1608 tylli ki skul ha kaba don ki District kiba la pyndep ban maramot hynrei don pat ki District kiba khlem pat sdang satia iaki kam” u la ong. U Myntri u la ïathuh ba ki District ba khlem pat sdang ia ki kam ban maramot ia ki skul ki kynthup ha East Khasi Hills (Mawsynram, Mylliem, Mawphlang Blocks), ha East Jaintia Hills (Khliehriat Block), West Jaintia Hills (Amlarem Block), Ri-bhoi (Umsning bad Umling Block), bad ha Eastern West Khasi Hills (Mawthadrashain Block). “Ngi la shong bishar bniah halor kane” u la ong. Haba kylli ia ki daw ba pynslem ban pyndep ia ki kam u Rakkam ula ong, “Ki don bun ki daw kynthup ka jingpynslem ki Contractor, namar ka jingbym ioh jaka, ka jingbym biang ka mang pisa bad ki jingeh ha ki jingstad (Technical Issue) bad kiwei kiwei”.

U Myntri ula ïathuh ha ka jingïalang, la ïakren sani bha haba ia dei bad ki sienjam ban shim khnang ban pyndep noh ia ki kam namar ki don ki Project ba hap ïakren bad ki Deputy Commissioner (DC) bad ki Director bad ka tnat Planning bad ka tnat Finance. Haba iadei bad ka jingpyntrei ia ki skul EMRS, u Myntri ula ïathuh ba ki don lai tylli ki Block ba ka Sorkar haduh mynta kam pat ioh jaka kynthup ha Mawkynrew bad Laitkkroh Block East Khasi Hills (Khatar Shnong) bad ha Rongara Block South Garo Hills.“Na ki 38 tylli ki skul EMRS ka Meghalaya ka ioh 13 tylli ki skul la sdang ban pyntrei bad na 23 tylli 16 tylli ki dang don hapdeng ka jingthep Tender bad ka sngi ba khadduh kan long 25 tarik Lber” u la ong.