Ki nongialam ka Khasi Student Union (KSU), Nongpoh Circle bad ka Saiden Unit ki la ioh ban aiti da ki ben shong bad ki desk sha ki bor pyniaid ka Saiden Secondary School kum ka jingkyrshan ia kane ka shlem ai jingstad ban kyntiew ia ka pule puthi.
Ha kane ka jingleit ban aiti ia kitei ki jingai sngewbha, na ka liang ka KSU la lamkhmat da ki nongialam ka Nongpoh Circle ba kynthup ia u Samla John Lyngdoh, President, samla Banshanlang Kharshanlor, General Secretary nalor kiwei kiwei ki dkhot bad ki nongkitkam ka Saiden Unit.
La shimti ia ki 10 tylli ki ben shong bad ki desk da u Headmaster ka Saiden Secondary School u Bah James Nongsiej ha ka jingsakhilang ruh ki nonghikai bad ki khynnah skul.
Haba ai jingkren ha kane ka sngi, ki nongialam ka KSU ki la pynpaw ia ka jingsngewkmen ban ioh tynrong lem ia ka jingkitkhlieh ban kyrshan ia kane ka shlem ai jingnang jingstad kaba la peit bad kyrshan hi da ka Dorbar Shnong Saiden kaban ai mynsiem ruh ia ki khynnah skul namar kane ka skul ka dang don hapdeng shibun ki jingduna.
Ki la pynpaw, ba hadien ka jingioh jingtip halor ka jingdonkam jong kane ka skul ia ki ben shong kumta kum ka seng kaba don ia ka thong ban kyntiew ia ka pule puthi, ki la shim da ka sienjam ban pynioh ia kine ki jingdonkam, da kaba ai mynsiem ruh ia ki nongpyniaid skul ba kin nym duh mynsiem ha ka jingshakri ka jong ki hynrei ban iai bteng ia ka jingtreishitom ban pynphriang ia ka jingnang jingstad.
“Ka jingnang jingstad ka dei u budlum jong ka lawei ba phyrnai jong u wei pa u wei u khynnah pule, kumta kum ki khynnah pule ki dei ban iai minot bad treishitom ha ki jingpule ka jong ki lada ki thrang ban kiew ha ka jingim jong ki”, ong ki nongialam ka KSU.
Na ka liang u Bah James Nongsiej, haba pdiang ia kine ki jingai sngewbha, u la ai khublei kyrpang ia baroh ki nongialam ka KSU kiba la kloi ban pynioh lem ia ki ben shong na bynta ka jingbit jingbiang jong ki khynnah pule, u la bynrap ruh, ba kane ka skul ka dei kaba dang don hapdeng shibun ki jingduna hynrei kim duh mynsiem ban iai shakri na bynta ka jingnang jingstad jong ki khynnah pule kiba wan na ki longiing kiba kham duna ka jingioh jingkot.
