Iaid Rally ka shnong Nongrah, pynrem ba shah thombor ka longkmie ha Umroi Airport

Ki nongialam shnong ka Umroi Nongrah lem bad ki spah ngut ki nongshong shnong ki la mih paidbah ban pynrem jur ia ka jingjia shah thombor kawei ka longkmie kaba dang armet kaba la jia hajan ka khyrdop jong ka Shillong Airport ha Umroi bad ki la dawa ruh ba ki bor ka ain kin pynshitom tyngeh ia u runar ba donkti ha katei ka jingjia. Ha kane ka jingmih ki paidbah sha surok ban iaid paidbah naduh ka shnong Nongrah shaduh ka jaka ba la jia katei ka jingjia shah thombor ki la rah ruh da ki plakad kiba la thoh ia ki kyntien pynrem bad ruh ban pyrta shla ban pynrem ia katei ka jingjia.  Kum ban pynkynmaw, ka jingjia shah thombor jong ka longkmie kaba dei ruh ka nongtrei ha Shillong Airport, kaba la tip kyrteng kum ka Allana Lyngdoh Mawphlang ka la jia ha ka step jong ka 19 tarik Lber, ha kaba u runar ba la tip kyrteng kum u Kyrshanlang Marngar na Rudwah Nongrah, u la thombor ia kane ka longkmie da ki tiar kiba neb haduh ba ka la mynsaw jur bad la pynkit ban shah sumar sha NEIGHRIMS hospital.

Ia katei ka jingmih paidbah ki nongshong shnong ka Umroi Nongrah, la lamkhmat hi da u Rangbah Shnong Bah P Dkhar, ha ka jingiadonlang ruh u Chairman Bah GS Kharlor, Rangbah Dong Bah A Khymdeit, ka Kong T Makhroh, nongialam Seng Longkmie bad kiwei kiwei ha kaba la shimbynta ruh da ki khynnah skul jong ki skul kiba don ha ka shnong Umroi Nongrah. Haba kren ha kane ka sngi, na ka liang ki nongialam shnong ki la pynpaw ia ka jingsngewsih kthang bad ban pynrem jur ruh ia u runar ba la donkti ban thombor ia ka riew kynthei ymtang ba la wanrah ia ka jingtieng jingsmiej ia ki nongshong shnong hynrei kaba la pynjah burom ruh wat ka ijot jong ka shnong ka thaw.

Ki la pynpaw ruh, ki la pynpaw ruh ia ka jingsngewkhia kaba jur ba kum kine ki jait jingjia ki wan jia tang namar ka jingroi stet ruh ki jingdih buaid ba bun jait hapoh ki shnong ki thaw, kumta ki la kyrpad ia baroh ki nongshong shnong ban ia tylli lang ban rad dyngkhong ia kine ki jingsniew khnang ba ka shongsuk shongshngain kan don ha ki shnong ki thaw. Shuh shuh ruh, ki la pynpaw ba ki bor ka ain ki dei ban shim da ki lad ba tyngeh pyrshah ia u runar ba la donkti ha katei ka jingthombor ia katei ka longkmie bad ki la ai khublei ruh ia ka tnat pulit kiba la treishitom ban iohkem noh ia u ha katei hi ka sngi ba la jia kane ka jingjia ba sngewsih, da kaba phah ruh ia ka jingkitbok kitrwiang ia katei ka longkmie ba kan ioh noh ia ka jingkoit jingkhiah kaba pura.