Paw ki kam thurmur ka MePDCL, poi bill T.28,902 ba khein lang bad kaba rim

Ka seng FKJGP-East Jaintia Hills hynnin ka sngi 28 tarik Lber hapoh ka jingialam u President ka FKJGP-East Jaintia bad u information secretary ka seng u bah Deihok Sumer bad u Bah Michal Chyrmang ryngkat ka jingdonlang u Secretary ka FKJGP-Khliehriat Circle bah Just me Sana, ka seng ka la leit ban ia kynduh ia u Executive Engineer (EE) ka MePDCL Khliehriat Distribution division Moowakhu hadien ba la ioh jingujor ba jingpaw biang ka baithang bording jong kawei ka longkmie wat haba ka la dep siew.

Kane ka la jia ha kawei longiing ka longkmie ba kim kwah ban pynpaw kyrteng ha ka Shnong Khliehriat West, kata ha ka 6 tarik Rymphang la wan ai ka slip baithang Bording kumba T.17,174 bad ia katei ka bill la dep Siew ha ka 26 Rymphang, hynrei yn da la poi ka bill u bnai Lber ha ka 5/03 ki trai iing ki kyndit ban iohi ba ka bill ka poi haduh T.28,902 bad ynda check bha ia ka bill la shem ba la kheiñ lang ia ka bill barim ba la siew ha ka 6 tarik Rymphang, ym tang katta ka longkmie ka la iathuh ba man ki por ki shait jia kumne hynrei da ka jingbymnang ban ujor ka la siew beit hynrei dei tad hadien ba ka seng ka la ioh ia kane ka jingujor khlem pynslem ka la leit pan jingshai na u EE ka MePDCL.

Haba iakren bad utei u Officer ka tnad bad ynda la dep peit bha na ka liang u EE ula kubur ba la dep siew ia ka bill jong u Lber,ha ba ka seng ka pan jingshai na utei u Officer halor ka jingleh thurmur ula kynnoh ba dei ka jingleh tnad ba ai bill jong ka MePDCL, Shillong hynrei na ka liang ka seng kam hun ia kitei ki jingpynshai utei u Officer bad hadien ba la iakren bad u EE la pynbeit ba katei ka longkmie kan hap siew sa tang ia ka Bill ba Thymmai kata T.11,574 ha ka jaka T.28,902.

Halor kane, ka seng ka la phah jingthoh na ka por sha ka por sha ka MePDCL ban ai ki Awareness programme sha ki nongshong Shnong khnang ban iashai ha ka rukom kheiñ rukom diah bad ki rukom siew ia ki bill light, hynrei ki bor ba dei peit kim shimkhia bad khadduh ngi kyntu ia ka MePDCL ban pyrkhat ia ki paidbah namar ka ka jingleh thurmur ka buh jingeh ia ki paidbah khamtam ha kum kane ka por kyrduh kam kyrduh jam pynkut ka kyrwoh na u Information Secretary ka FKJGP-East Jaintia u Bah Michal Chyrmang.