Shah pynkyntang u Fr. Bernard Laloo kum u bishop ka Jylla Niam bah Shillong

U Fr. Bernard Laloo ula shah pynkyntang kum u Auxiliary Bishop ka jylla Niam Bah Shillong hynne ka sngi ha Cathedral of Mary Help of Christians, Laitumkhrah.
U Most Reverend Leopoldo Girelli, Apostolic Nuncio sha ka ri India bad Nepal u la pynkyntang ia u Fr Bernard Laloo kum u Auxiliary Bishop ka Archdiocese jong ka Shillong ha ka jingdonlang u Archbishop Victor Lyngdoh, ki nongsharai Balang na jylla bad kylleng ka thain shatei lammihngi bad ki paid riewngeit Katholik ka jylla.
Ha kane ka jingpyn-kyntang Bishop la wan sakhi da u Myntri Rangbah ka jylla u Conrad Sangma, u Symbud Myntri Rangbah u Bah Prestone Tynsong bad kiwei kiwei.
U Fr. Bernard Laloo ula shah thung kum u Bishop ha u Pope Francis ha ka 8 tarik u Rymphang, 2025 bad hynne ka sngi la pynkyntang ia u kum u Bishop.
Kum ban pynpaw ia u Bishop Bernard Laloo ha ka 16 tarik Jylliew 1976 ha Laitlyngkot bad u dei u khun jong I Kong Aquila Imai Laloo bad Bah Pius Prel Shabong (Bam kwai ha dwar u Blei).
Ula shimti kum u Lyngdoh Sohblei ha ka 30 tarik u Iaiong, 2006 bad ula ai ia ka jingshakri ha ka Archdiocese bad ula bat ruh ia ki kyrdan ba hakhmat kynthup kum u Assistant jong ka St. Paul’s Church, Upper Shillong, Administrator jong ka Christ the King College, Shillong, Dean of Studies ha St. Paul’s Seminary, Shillong, Principal jong ka Divine Saviour Higher Secondary School, Laitumkhrah, Director jong ka Social Service Centre, Shillong bad Chancellor jong ka Archdiocese bad ula shakri ruh kum u Parish Priest jong ka Cathedral of Mary Help of Christians, Laitumkhrah.
U Bishop Laloo u la pyndep ia ka jingpule ia ka Bachelor of Arts bad ula pyndep ruh ia ka Master of Arts ha ka Sociology. U la pyndep ruh ia ka Post Graduate Diploma ha ka Counselling Psychology bad u dei ruh u nongthaw jingrwai niam ba tbit, u nongthoh kot bad ula pynmih ruh katto katne tylli ki phlim Khasi kum “Synshar ka Jot ” bad “Hato Shano Kan Ialam ” bad u la noh synniang bun ha ka imlang sahlang.