Ha ka Tamasa Shad Sajer, pynbna u bah Prestone

Ki nongialam ka Raid Nongpoh ha ka 29 tarik u Lber ki la dap da ka dur phuhmut phuhmat ban ioh sngew ia ka jingpynbna syndon kaba kmen kata hadien ba u Symbut Myntri Rangbah ka Jylla u Bah Prestone Tynsong u la pynbna da ka song pisa kaba 5 klur tyngka ban siang rong noh ia u surok na Pahamsyiem sha u Lum Wyrtoh u ba dei u lum ba ju pynlong ia ka lehniam leh rukom jong ka Raid. Ia kane ka jingpynbna ia katei ka song pisa ban siang rong ia u surok la pynbna ha ka Tamasa Shad Sajer ba la pynlong mynta ka sngi da ka Raid Nongpoh kaba dei ka raid kaba hap hapoh ka jingpeit jingkhmieh jong ka Nongpoh Elaka Sirdarship. Ha kane ka Tamasa Shad Sajer, la wan ban shimbynta da u Bah Prestone Tynsong, Symbut Myntri Rangbah ka sorkar jylla, u MLA ka Nongpoh u Bah Mayralborn Syiem, ka MDC jong ka Nongpoh ka Kong Rona Khymdeit, u Deputy Commissioner ka Ri Bhoi u Abhilash Baranwal, u Bah Linus Lyngdoh, Lyngdoh Raid Nongpoh, ki ophisar sorkar bad kiwei kiwei ki nongialam ka Raid Nongpoh.

U Bah Linus Lyngdoh, Lyngdoh Raid u la pynpaw, ba ka lehniam Shad Sajer ka dei ka jinglehniam jong ki mynbarim ban ai nguh aidem ia u Blei Nongbuh Nongthaw halor ki jingkyrkhu kyrdoh ia ka rep ka riang, ki soh ki pai, ka Koit ka Khiah bad kiwei kiwei, hynrei hadien ba ki paid ka Raid ki la kylla Khristan kane ka lehniam kam don shuh hynrei ban pynneh pynsah ia ka riti ka dustur, ka kolshor, ka riam ka beit tynrai kumta mynta la pynlong beit satang ia ka Tamasa Shad Sajer khnang ba ka pateng kan nym klet ia la ka tynrai. La iathuh ruh, ba u Lum Wyrtoh, u dei u lum ba kyrpang ba ju shong ju sah da ki mynbarim bad kiba ju pynlong ia ki jinglehniam leh rukom bad hadien ka jingbun paid bad jingduna um shiteng ki la hiar noh sha them ban shong ban sah ha ka Dong Sajer ban pynlong ruh ia ka lehniam ba la tip kum ka Lehniam Sajer bad hadien ba kito kiba sah ha u tei u Lum ki ju khot ia kiba shapoh hey Nongpoh kumta sa mih ka kyrteng Shnong Nongpoh. Haba kren kum u kongsan, u Symbut Myntri Rangbah Bah Prestone Tynsong, u la ai ka jingiaroh kaba khraw ia ki nongialam ka Raid Nongpoh kiba dang shimkhia ban pynneh pynsah ia ka riti dustur, ka lehniam Sajer kumba la buh da u mynbarim, khamtam ka jingpynbit pynbiang ban sumar sukher ruh ia u ne u Lum Wyrtoh u ba la shong lasah da ki mynbarim, u la bynrap ruh, ba ka sorkar jylla ruh ka dang iai shimkhia ban pynneh pynsah ia ki riti dustur tynrai, ha kaba naduh u snem 2018, ka sorkar ka la iai kyrshan ia ki kynhun bapher bapher, ki Raid bad ki Elaka ban ri kunai ia la ki jinglong tynrai.

Kum u Symbut Myntri Rangbah ba dei peit ruh ia ka tnat PWD, u la shim ia ka bynta ban pynbna ruh ia ka jingpynmang ia ka song pisa kaba 5 klur tyngka, lyngba ka state financial budget 2025-26 na bynta ban tei bad siang rong noh ia u surok ba 2 kilometre eiei ban pyniasoh sha u tei u Lum Wyrtoh, ban pynurlong ia ka jingangnud bad ki jingdonkam ban ioh surok bha kumba la pynpaw da ki nongialam ka Raid, ki nongialam shnong bad ki nongialam niam ha kaba ia dei bad u surok ba paka. Shuh shuh ruh, u la kyntu ruh ia ki bor ka Raid Nongpoh ba kin thaw noh da kawei ka society kaban treikam ha kaba ia dei bad ka jingmang pisa na ka  Ministry of Tourism, Government of India khnang ban nang pynbha shuh shuh ia ki jingdonkam ha u ne u Lum Wyrtoh naduh ki jingtei bapher bapher bad kumjuh kane ka society kan khmieh ia ka jingbit jingbiang jong kane ka jaka, ban pynmih pisa na bynta ka jingmyntoi jong ka Raid.