Ki khyrdop lum khajna ka tnad khlaw yn pyniaid hi ka Council: CEM

Ka Hynniewtrep Integrated Territorial Organisation (HITO) hynne ka sngi ka la iakynduh ia u Chief Executive Member ka Khasi Hills Autonomous District Council (KHADC) halor ka jinglum pisa be-ain T.5000 ki khyrdop khrong khajna na ki kali kit rnga ha Puriang.

Haba kren sha ki lad pathai khubor u President ka HITO u bah Donbok Dkhar ula ong, ba na ka liang u CEM u bah Shemborlang Rynjah ula kular ban shimkhia bad kan shimti ban pyniaid noh ia ka khyrdop khrong khajna jong ka tnad khlaw ka Council.

Katkum ka jingong u President ka HITO, u CEM naduh mynta ka sngi ka 1 tarik Iaiong, yn pynkut noh ia ka jingaiwai sha ki riew shimet bad ia ki jaka khrong khajna jong ka tnad khlaw ka Council yn peit hi noh da ka District Council.

“U CEM ula ong ba ia katei ka khyrdop la aiwai da ka EC barim ka KHADC sha ki riew shimet ban khrong khajna bad ula kular ba kane ka EC thymmai kan shimti hi noh ban pyniaid ban peit ia katei ka khyrdop hadien ba kala mih ka kynrum kynram,”ula ong.

Ula ong ba ka seng ka dawa ba ka District Council kadei ban leh da kaba tyngeh pyrshah ia kitei kiba lum pisa beain na ki kali kit rnga.

U bah Donbok ula ong, “ Ha ki thain nongkyndong, ki paidbah naduh ki khynnah ki kit rnga ar lai borni namar ba kim lah kotbor ban thang da ka tyndong gas. Hynrei kine ruh ki la hap ban siew khajna bad kane ka long kaei kaei kaba pynkthang mynsiem.”

Ula ong ba ka seng HITO kan iai peitngor bad kan iai buddien nangne shakhmat la ka KHADC ka la lah ne em ban tehlakam ia kane ka jingkhrong pisa beain.