Baroh ki nongmih khmat ha Parliament ki la dawa pynrung Ktien Khasi-Garo :MP Rajya Sabha

U MP ka Rajya Sabha na Meghalaya u Dr. Wanwei Roy Kharlukhi ula ong ba baroh ki nongmihkhmat sha Iing Dorbar thawain ka ri ka Parliament, ki la iasaid tyngeh ban dawa ban pynrung ia ka ktien khasi bad Garo ha ka khyrnit ba phra jong ka Riti synshar ka ri India. U MP ka Rajya Sabha u Dr. Kharlukhi ula ong ba ym tang ma u, uba kren ia ka jingdonkam ban pynrung ia ka ktien Khasi ha ka 8th Schedule ka riti synshar ka ri, hynrei kiwei ki MP ruh kynthup ka Agatha K Sangma, u bah Vincent H Pala bad u Dr. Ricky J Syngkon ruh kila kren hapoh Parliament. U Dr. Kharlukhi ula ong ba haka jingiohi jong u, na North East ka shitom ban kren namar ba ym don ia ka jingbun ngut ki MP kumba long mynta da poi ha Parliament, ka BJP la kajong, ka Congress la ka jong.

“ Ka jingdon jong nga ha Parliament, nga iohi ba ngi na Northeast ngi shitom  ban kren namar ba ngim don ka jingbun ngut ki MP. Kumba long mynta ynda la poi ha Parliament ka BJP la kajong, Congress la kajong bad kam don ka jingiatylli,” ula ong. U la ong ba lada don kawei ka Party riewlum na NE ban kynthup baroh ki jylla kaba lah ban don 20 ne 21 ngut ki MP, kane ka sur ka lah ban pynsngap ia ka sorkar India. U Dr. Kharlukhi ula ong ba watla ki don ka Northeast MP Forum, hynrei ym nud ban ktait ia ki mat kiba long syier hynrei la iakren tang ia ki kam pynroi bad ula ong ban leit marwei kan nym poi shaei shaei.

Ula ong ba ia kane ka mat ym dei ba kren tang ki MP hynrei la pas la slem da ka Iing Dorbar ka jylla Meghalaya, hynrei haduh mynta kam shym la paw dak eiei. Kumjuh haba iadei bad ka Inner Line Permit (ILP) ruh haduh mynta ka sorkar India kam shym la leh eiei. Ha kajuh ka por, u la ong ba yn ym ioh jingmyntoi lada ym lah ban wanrah ka jingiatylli jong ki trai shnong ka thain lammihngi ka ri India namar na bynta ka politik la pynphiah bad pyniapher jaidbynriew shiphang u Garo u Khasi, Jaintia, Rabha bad kane kan ym ym poi sha eiei ruh.