Mih ki paidbah ban pyrshah pynrung Aadhar ha Jylla

Ki nongshong shnong na kylleng ki jaka hynne ka sngi ki la mih paidbah ban wan ai jingkyrshan ia ka jingialang ba la khot da ka Awaken India Movement (AIM) ban pynpaw ia ka jingpyrshah halor ka jingpynbor ka sorkar ia ki paidbah ban pynrung kyrteng Aadhaar khnang ban ioh ia ki jingmyntoi. Ia kane ka jingialang paidbah la pyllong hakhmat u Mot Kiang Nangbah hajan Civil Hospital, Shillong ha ryngkat ka jingdonlang ki nongialam ka AIM bad u MLA ka North Shillong u bah Adelbert Nongrum. U bah Adelbert haba kren ha kane ka jingialang ula ong ba ym dei ba pyrshah ban leh ia u Aadhaar hynrei ka sorkar kam dei ban pynbor ia ki paidbah ban leh Aadhaar. Ula ong ba ma ruh kum u MLA um pat leh Aadhaar bad u wan ha kane ka jingialang ban ai ka jingkyrshan ia kane ka jingdawa ban ym pynbor ban leh Aadhaar.

“ Nga ruh nga dei uwei napdeng ki nongialam u bym pat shim bad ym pat leh ia u Aadhaar, wat ia u injek COVID ruh nga bad ka iing ka sem, ngi khlem shim. Namar kata ka sorkar India kam lah ban pynbor ia ki paidbah,” ula ong. U la bynrap, “Ka sorkar ka la dei ban pynmih ia ka ain ban ong ba kiba khlem leh ia u Aadhaar kim ioh thep Vote.” U la kyntu ia ki paidbah ba ki dei ban ieng tylli bad kim dei ban tieng bad shah pynbiej. Ha kajuh ka por, u MLA ka North Shillong ula pynkynmaw ba dei ha katei ka jaka ba ula pyllong ia ka jingshah thngan ha ka por ba u long MDC mynshwa ban dawa na ka sorkar bad u Lat ban mynjur noh ia ka Village Administration Bill (VAB). U la kyntu ia ki nongialam ka AIM ba kim dei ban shu kut hangne hynrei ki dei ban leit sha ki MLA, ki MP ba kin tuklar bad ka sorkar kam dei ban pynbor ban leh Aadhaar.

Katba u nongialam ka AIM u bah Banshai Marbaniang ula pynrem jur ia ka sorkar kaba pynbor ia ki paidbah ba ki dei ban leh ia u Aadhaar. U bah Marbaniang ula ong, ha kane ka jylla ym don shuh ki nongialam hynrei la bun tang ki nong lilam namar kim shym la leh eiei wat la ka sorkar ka pynbor ban leh ia u Aadhaar. “Lada ka sorkar ka sngewthuh ba ka Aadhaar ka long ka bynta ba kongsan, la dei ban bret noh ia ki Epic  bad ym donkam shuh ban leit thep vote namar ba ki nongmihkhmat ki wan sha konstiwensi tang ban pynbiej,” ula ong.