Ym pat lah rai ka sorkar ban pyniaid ia ki 108, mih biang ki jyrwit jyrwat ba thep Tender

Ka Myntri ka tnat ka koit ka khiah ka Kong Ampareen Lyngdoh, ka la ong ba ka Sorkar haduh mynta kam pat lah ban jied ia ki nongthep Tender ba tbit ban pyniaid ia ka 108 Emergency Services ha Meghalaya bun ki jyrwit jyrwat. Haba kren sha ki lad pathai khubor, ka Kong Ampareen kala ong “Baroh ki nongiashim bynta ban thep Tender ban pyniaid ia ki kali 108 ki la pynmih biang ia ki jyrwit jyrwat. Kumta haduh mynta ia ka 108 Service shipor la pyniaid da ka tnat National Health Mission (NHM). Hynrei ngim pat lah ban weng ia ki jyrwit jyrwat bad ngim pat lah ban weng ia ki jingeh bad dei namar kane ngim pat lah ban jied nongpyniaid thymmai ia ki kali 108”. “Ka long kaba donkam ba ïa ki 108 tylli ki jingshakri dei ban pynïaid da ki nongthep tender ba tbit ban pynthikna ba ki nongtrei 108 kin ioh jingmyntoi kum ka shuti, insurance bad kiwei kiwei ki jingmyntoi na ka company ba pyniaid ia ka 108 bad kine ki hok kin wan baroh lyngba ka jinglah ban pynbeit ia ki jyrwit jyrwat kiba mih baroh” ka la ong.

Da kaba pynpaw ba ka NHM ka pynïaid beit ïa ki jingshakri, ka Myntri ka la ong, “Hynrei ngi donkam mynta ban pynbun ïa ki kali kit nongpang (Ambulance). Phi peit ïa ki katto katne ki kali kit nongpang jong ngi, kim long kaba bha bha. Ki nongtrei jong ka 108, ka jaka sah, ki hok jong ki, ki jingmyntoi jong ki baroh ki dang sahkut”. “Balei ka jingiathong thep Tender ka long kaba jyrwit jyrwat namar man ka por ba don ka jingthep tender, phim tip mano ba dei ki nongthep tender, nangno ki wan bad hato kine baroh kin jop ne em ia ka jingbishar bniah. Ki company ba thep tender ki hap ban pynthikna ba ki don ïa ki jingdonkam, ki dei ban pynbiang ia ki kot ki sla, ki hap ban pynthikna ba haba ki treikam ha ka jylla Meghalaya ki hap ban ryntih ia ki jingdonkam namar ka Jylla ka long kaba kyrpang” ka la ong.

Haba kylli, ka Myntri ka la ong ba khyndiat bnai mynshwa, ka la don ka jingthep tender ba la khot hynrei mynta pat ki don katto katne ki jingduna ha baroh ki nongthep tender. “Hynrei ngim pat lah ban weng ia kine ki jyrwit jyrwat ba kongsan baroh ban pynthikna ba ki nongthep tender ki don lut ïa ki kot ki sla kiba donkam. Ym tang ba ki lah ban long kiba biang hynrei ka jinglong jingman jong ki Company namar kawei ka Company ka kynnoh pyrshah ia kawei pat halor ka jingpyniaid kali 108, ka jingkynnoh bym don License bad kiwei kiwei namar ki trai Jylla ruh kim da pat kot bor ban thep tender marwei bad ki hap ban iatreilang bad ki Company bar Jylla”.