U Capt. Williamson Sangma u nongialam ki jaidbynriew Garo

U Symbud Myntri Rangbah ka jylla ba peit ia ka District Council Affairs (DCA) u Bah Prestone Tynsong ula ong,  ba 96-98% na ki jaka jong ka jylla Meghalaya ki hap hapoh ka Sixth Schedule jong ka riti synshar ka Ri India. Ia kane ula kren ha ka jingialang rakhe dap 73 snem jong ka Garo Hills Autonomous District Council ba la pynlong ha District Auditorium, Tura hynne ka sngi. “Nga kyntu ia ka GHADC kaba la shah pynkup bor ha ka Sixth Schedule jong ka riti synshar ka Ri, wat klet ba 96% haduh 98% ki jaka ba ngi don ha ka jylla Meghalaya ki hap hapoh ka Sixth Schedule. Ka jaidbynriew ne ka jylla ba longtrai ia ka khyndew ka shyiap ka lah ban pynneh ka jingtrai ialade na kawei ka pateng sha kawei pat” ong u Bah Prestone.  Ula bynrap u Capt. Williamson Sangma u dei u nongialam bakhraw ki jaidbynriew Garo bad kumjuh ruh ia ka jylla Meghalaya uba la trei borbah ha ka jingiakhun ban pynioh la ka jong ka jylla.

“U Capt. Williamson Sangma ula iehnoh ia ka shuki Myntri Sorkar ka jylla Assam hadien ba ka iing dorbar thawain ka jylla Assam ka la mynjur ia ka Bill ban pynlong noh ia ka ktien Assamese kum ka Ktien Sorkar ne Official Language ka jylla Assam. Balei u hiar shuki noh ka dei na bynta jong phi bad jong nga bad lada dei ba u nongialam jong ngi u dang iai bteng ban shong ha ka shuki myntri, ngam tharai ba phin ioh ban kren Garo. Ngam tharai kan don ka ktien Khasi kumba ngi long mynta, ngim dei ban klet ia u nongialam ba khraw ha ka thain. Kane ka juk mynta ka la leh klet noh ia ka jingaiti lut ki nongialam mynshwa, wat la bun kim tip hynrei ngim dei ban klet ruh ia ki kpa tymmen bad dei namar jong ki ngi long kumne kumba ngi long mynta” ong u Bah Prestone.

Ula ong ka GHADC ka la dap 73 snem  ban ai jingshakri ia ki paidbah ka rilum Garo khamtam ban pynneh ia la ka riti dustur tynrai bad ula ai burom ia ki nongialam ba la donkti ban thaw ia ka GHADC, khamtam ia u Capt. Williamson A. Sangma u CEM banyngkong ka GHADC ba la sdang ha ka 14 tarik u Iaiong 1952 hapoh jong ka jylla Assam. U Bah Prestone ula kyntu ba donkam ban pynkhlain ia ka Sixth Schedule bad ia ka bor treikam jong ka Council bad ula ban jur ia ka jingkongsan ban pynnah ia ka tynrai na ka bynta ka lawei. Ha kane ka sngi la ioh ka jingkren na u Chief Executive Member (CEM) ka GHADC u Albinush R. Marak bad la pyniphuh iphieng ia prokam da ki jingrwai bad shad tynrai ki khynnah skul bapher bapher.