Iakynduh ki MLA Jharkhand ia ka Estimates Committee ka Iing Dorbar halor ka synshar bad ka roi ka par

Ki nongthaw ain ka Meghalaya bad Jharkhand hynne ka sngi ki la iakynduh lang ban iakren halor ka jingpynbha ia ka synshar khadar, ka roi ka par bad ki lad jingiatreilang ban ioh jinghikai mar kylliang. Kane ka jingïalang ka dei ba la pynlong da ka Estimates Committee jong ka Ïing dorbar Thaw Aiñ ka Jylla Meghalaya bad ki katto katne ngut ki nongthaw ain ka lane ki dkhot jong ka Ïingdorbar Thaw Aiñ ka Jylla Jharkhand. Ïa kane ka jingiakynduh lang la pynlong ha Assembly Secretariat’s Conference Hall Shillong.

Ïa kane ka jingïalang la pyniaid da u MLA ka Nongpoh u Bah Mayralborn Syiem ha kaba kane ka jingïalang ka la wanrah lang ia ki nongthaw ain bad ki ophisar na baroh ar tylli ki Jylla ban iasam jingmut halor ki rukom synshar, ki jingeh ha kaba pyntreikam ia ka bha ka miat, bad ka bynta kaba nang kiew jong ki committee thaw ain ha kaba kyntiew ia ka roi ka par. Ïa ka kynhun napoh ka Jylla Jharkhand kaba don mynta ha ka jingleit sha kiwei ki Jylla kum ka Assam, Meghalaya, Sikkim, bad Odisha, la ialam da u MLA ka Litipara u Hemlal Murmu bad kiwei ki MLA kata u MLA K.S.B. Mehta (Panki), Mathura Mahto (Giridih) bad Amit Kumar (Silli).

Ia ka kynhun na Jharkhand la pdiang sngewbha da ki dkhot ka Meghalaya Estimates Committee, kiba kynthup u Bah Renikton Lyngdoh Tongkhar (Mawkyrwat), u Bah Adelbert Nongrum (North Shillong), u Remington Gabil Momin (Rambrai-Jyrngam), u Bah Charles Marngar (Mawhati), bad ka Miani D Shira (Ampati). Ki jingïamir jingmut ki la pynleit jingmut ha ka jingïahap bad jingïapher ha ka rukom shna bad treikam hapdeng ki ar tylli ki dorbar, khamtam eh shaphang ka jingkitkhlieh jong ka Estimates Committee ha kaba buddien ïa ka jingmang pisa bad ki skhim pynroi.