Plie u Conrad ïa ka Workshop baar sngi halor ka “Emerging Technologies”

U Myntri Rangbah ka jylla u Conrad k Sangma ula plie lyngba ki kor digital ia ka Workshop kaba ar sngi halor ka phang “Emerging Technologies” kaba la pynlong ha State Convention Centre, Shillong ha ka 24 tarik mynta u bnai. U Conrad haba ai jingkren ula banjur ia ka bor jong ka jingkylla lyngba ki kor teknoloji ha ka kam ai jingshakri bad ki long kum ki atiar kiban pynbeit ia ki jingeh ban pynbha ia ka rukom ai jingshakri ia ki paidbah bad ula pynpaw ruh ia ka jingjop jong ka Meghalaya’s e-Proposal ka jingpyniaid ia ki kot ki sla ne ki File lyngba jong ka Meghalaya Enterprise Architecture framework. U Myntri Rangbah ula pynbna ba ka Meghalaya shen kan sa pyntreikam noh ia ka Blockchain-based Employee Data & Promotion Tracking System bad kane kan sdang shwa na ka Police Department bad ula ong, kane kan pynduna ia ka jingpynslem bad kan kyntiew ia ka jingkhuid jingsuba ha ka rukom thungkam bad ha ka jingpyniaid ia ka jingkyntiew kyrdan ha ki tnad sorkar bapher bapher.

Ula pyntip ruh ba ka jylla kala iaid shakhmat ha kaban pynduna ia ka jingkhlad ki longkmie kiba punkhun kaba la jan kot sha ka 50% lyngba ka jingpyndonkam ia ki kor teknoloji bad ban kyrshan ia ki jingpun khun kiba don hapdeng ka jingma. Nalor kane, ula ong ruh shaphang ki kor teknoloji bad ban pyndonkam ia ki Robot bad Artificial Intelligence ne AI ha ka kam rep kam riang ne ha Greenhouse Farming bad ka pynpaw ia ka jingthmu ka jylla ban pyndonkam noh da kitei ki kor teknoloji ha ka jylla Meghalaya, khamtam na ka bynta ki jingthung kum u sohshan bad u salat, ban ialeh ban kyntiew ban lah ban pynmih bun shuh shuh bad ula banjur ban wad ia ki lad ki lynti ban pyndonkam noh ia ki kor ‘Virtual Reality’ ha ka liang ka kam jngohkai. U Conrad ula kyntu ia ka jingdonkam ban don ia ka jingiatreilang kaba iajan bad ka NeGD, IndiaAI bad kiwei kiwei ban pynthikna ba kan don ka jingkiew ha ka jingpyndonkam pura ia ki kor teknoloji ha kylleng ka jylla.

Ha kane ka workshop la iatai sani bha halor jongka Artificial Intelligence, Blockchain, Cybersecurity, UX ha ka kam shakri paidbah bad Public Digital Infrastructure bad ka thong jong kane ka prokram, ka long ban pynngam jylliew ia ka rukom sngewthuh ia ki kamram jong ka teknoloji ban saindur ia ka lawei ha kaban ai jingshakri, kaba iaid ryngkat bad ka ‘Digital Meghalaya’ Vision ka Meghalaya bad ka National Mission kum ka Digital India bad IndiaAI. La ioh ruh ia ka jingkren na u Chief Secretary ka jylla u D.P. Wahlang bad u Nand Kumaram, President bad CEO jongka NeGD bad kiwei kiwei.