Ngi khlem pynlong curfew, tang hapoh 2 kynta ba byrngem la pyllait ia ki kali

Ka seng Hynniewtrep Youth council Nongthliew Circle hapoh ka jingïalam u bah Joplang Kharnaior ha ka 28 tarik u Iaiong 2025 ka la leit ban ai da ka jingthoh ha ophis ka Deputy Commissioner ka Eastern West Khasi Hills District ban dawa ban weng noh ïa ki kyndon 163 BNSS kaba la pynjari ban ym shah ïa ki trok kiba kit palat 9 ton ban ïaid na ka surok Mawmaram sha Mawlyndep kaba la ktah ia ki paidbah ban pynpoi ia ki marbam bad kiwei kiwei. Ka seng kala dawa ruh ba dei ban pynmih noh da kawei ka order ka ban ym ktah ïaki paidbah.

U bah Kharnaior ula pynshai ba ka jingbym pynlong shuh ïa ka Curfew ne ka jingshah thngan ha ka miet jong ka 25 tarik u ïaïong 2025 ka dei namar ba hadien ba ka seng ka la byrngem ban pynlong da ka curfew ne pynlong ïa ka jingshah thngan lada ym pynlait ïaki trok kit khaw ne cement hapoh ka 5 baje ha katei ka sngi, tang hapoh 2 kynta ba ka seng kala byrngem ki bor badei khmih kila pynlait noh ïa kitei ki kali bad ka jingpanpor ka seng ban pynshai haka sngi ka 28 tarik u Ïaïong 2025 ka dei namar ha kane ka sngi ka seng kan leit ai daka jingthoh sha ka sorkar halor katei ka jingeh namar ka jingpynlait ïaki kali ha katei ka sngi ruh ka shu long beit haka jingpynbor khlem da ai ïaka order ïano ba dei ban bat bad ïano ba ba dei ban pynlait.

U bah kharnaior u la kyntu ruh ïaka Association jong ki trai trok bad nongniah trok ba kumba kila pynpaw haki lad pathaikhubor ba ki don ki sengbhalang kiba khrong pisa na ki trok kiba ïaid na ka surok Mawamram, ka Association ka dei ban pynshai mano kita ki sengbhalang bad ka dei ruh ban ai daka FIR ïa kita ki seng. Shuh shuh ka seng kala kyntu ïaka sorkar ban pynheh bad ban pynskhem ïaka surok Mawmaram.