Plie u ma Lahkmen ia ka iing skul Demthring Wahthang

U Lahkmen Rymbui MLA ka Amlarem Constituency uba long ruh u nongai buit ka sorkar Jylla, hynne ka sngi ula plie iaka ïing skul building thymmai ka Demthring Wahthang Govt L.P School kaba la seng naduh u snem 1973, kaba la shna lyngba ka State Mission Education Phase II jong u snem 2023-2024 haka mang pisa ba 43 lak tam. Ha kane ka sngi plie ia kane ka ïing skul la donlang ki riew ryngbah ka shnong naduh u waheh shnong u E.Ryngkhlem, u P.M Ryngkhlem, S.B Ryngkhlem, L.C.Ryngkhlem, ki paid nongshong shnong ki nonghikai ki khynnah skul bad kiwei. U Lahkmen Rymbui haba kren u ong ka jingnang jingstad dei kaba kongsan tam haduh katta katta, bad daka jingiatreilang lah ban poi shaka thong jingjop naka bynta ban kyntiew iaka pule puthi.

Kum u nongmihkhmat u ong katba lah u pyrshang ban shimkhia iaka kam, bad ka jingioh ia kane ka skul building thymmai ruh dei lyngba ka jingshimkhia ka sorkar kaba don iaka jingkitkhlieh. Ha kajuh ka por u iaroh ia u montri ryngbah duh ka sorkar Jylla uba la pyrshang trei iaki kam ba bha naki snem shaki snem. “Ki briew ki lah ban beiñ ban kynnoh hynrei kane ka sorkar dei kaba shim khia ban peit bniah iaka jingkiew ka pule puthi haki liang bapher bapher kynthup ruh ban shna iaki iing skul”. Ong u Lahkmen Rymbui. U pyntip ruh kumba long mynta u angnud ban kyntiew kyrdan iaka RMSA Shkenpyrsit Secondary School kumjuh ka RMSA ha shnong Mustem shaka Higher Secondary School.

Kane dei ka jingiaid lynti jong u kum u nongmihkhmat kumno ban was lad iaki jingdonkam ki shnong ki thaw. Kumta haba pan ka jingkyrshan jingiatreilang naka bynta kano kano ka kam ba bha, u kitbok ruh iaki nongialam ka shnong Demthring, ki nonghikai, ki khynnah skul ba kin dang lah shuh shuh ban kyntiew ia kane ka skul naka por shaka por. Ha kane ka juh ka sngi haka jingialang ba pyniaid da u M.S.Ryngkhlem ka School Managing Committee kala pynkup burom ruh iaka kong Nila Dhar kaba la shong thait kum ka nonghikai na kane ka skul.