Kwah u Myntri ban don daka Public Hearing ban rai ki paidbah halor ka lynti Rel

U Myntri ka Sorkar Jylla bad MLA ka UDP na Khliehriat u Bah Kyrmen Shylla u la pynpaw ba u kwah ia ki paidbah ka ri-lum Jaintia ba kin shim rai, la ka jingtyrwa ban pyntrei ia ka project lynti rel kan ai jingmyntoi ne em ia ki. Haba kren sha ki nongthoh khubor, u Bah Kyrmen ula ong ba, ym lah ban shim rai marwei halor ka lynti rel, namar ka donkam ban don daka jingiasyllok paidbah, khnang ba kin rai hi, la ka thaiñ ka donkam ne em. “Ha nga shimet hi, nga kwah ia ki paidbah ka ri-lum Jaintia ba kin shim rai halor ka kam lynti rel” la ong u Bah Kyrmen.

U Bah Kyrmen ula ban jur ia ka jingdonkam ba ka Sorkar Jylla kan pynlong ia ka public hearing ka ban ai ka rynsan ia ki paidbah ba kin pynpaw ia ki jingsngew bad ki jingai jingmut halor ka jingtyrwa project lynti rel ha East Jaintia Hills District.“Ngi dei ban pynlong ia ka public hearing bad ai ba ki paidbah ki rai (halor kane ka kam) naba kam dei ia u ma Kyrmen ne iano iano ruh ban shim rai. Ai ba ki paidbah kin rai la ka lynti rel kan ai jingmyntoi ne em ia ki bad ia ka thain” ula ong.U Myntri ula ong ruh “Lada ki paidbah ki ong em ia ka lynti rel, ha kane ka sngi hi ngi dei ban buh da u ‘fullstop’ ia kane ka kam. Lada ki paidbah ki ong hooid, balei tang ka Sorkar ka dei ban kyrshan, balei ki Sengbhalang, balei ym dei baroh?”.

Haba kylli, u Bah Kyrmen ula ong “Ngi la iohsngew ia ki sur bapher bapher bad ki jingai jingmut bad jingkynthoh bapher bapher halor kane hynrei uba bun paid hi un jop haba kut”.“Namar kata, ngin ieh beit ha ki paidbah ba kin rai. Nga don ia ka jignsngew ba lada ki paidbah ki kwah shisha, ka dei ban jia. Lada ki long pyrshah, balei ba ngin pyntreikam ia ka. Kane ka long namar ba kano kano kaba ngi leh, ka dei beit na ka bynta u paidbah” ula ong.