Kum u nongshong shnong ha Sawmer, ai skhim u CM ia ka Dorbar Shnong

U Myntri Rangbah ka jylla u Conrad K. Sangma hynne ka sngi, ula aiti ia ki P.A. System, Solar Panel bad ki shuki sha ka Dorbar Shnong Sawmer ha Upper Shillong, ha ka jingialang kaba la long ha Don Bosco Sunny Side, Shillong. Haba kren ha ka jingialang u Conrad Sangma ula ong “Kane kadei ka shnong ka jong nga, nga sngew kumba nga don ha iing bad kumta ka long kaba kham kyrpang shuh shuh ia nga ban ia don ryngkat lang bad phi kumne”. La bhah sha ka Dorbar ia ka T.20,79,323, kaba kynthup ia ka jingpynieng ia ki 120 tylli ki Solar Light, ban thied 600 tylli ki shuki plastik, ban buh ia ki P.A. System na ka bynta ban ai jingpynbna paidbah.

 “Nga pynthikna ia phi ba kane kam dei kaban kut noh, hynrei ngan dap da ka jingsngewkmen ban ioh ban bteng ban kyrshan ia ka dorbar ia ki dkhot bad ia ki paidbah baroh na ka bynta ki kam pynroi kiban sa wan shuh shuh ha ki snem ban wan” la ong u Conrad bad ka ong, ba ia ki mat kiba ka shnong ka shem jingeh yn sa iapynbeit noh bad yn sa sdang noh ia ki kam ki jam ban tei ia ka top um bad ula pynbna ruh ba kiwei kiwei ki tiar donkam kiba kynthup ia ki tiar tem yn sa sa pynbiang sha ki kynhun samla jongka shnong. Nalor kane u Myntri Rangbah ula ong, ba ka Discretionary Funds jong ka Chief Minister’s Special Development Fund (CMSDF) bad Chief Minister’s Special Fund (CMSF) kadei kawei na ki skhim kiba biang tam, namar ka ailad ia ka sorkar ban sdang ia ki prokram na ka bynta ka bha miat ha ka imlang sahlang.

 “Kane ka skhim ka long kaba iar, kaba khuid ba suba bad ka ailad ban tuklar ia baroh ki kam pynroi ha kylleng jong ka jylla bad nga sngew sarong ban pyntip sha phi ba kane ka skhim, lada phi kylli ia nga, hadien ba nga lah peit ia baroh ki skhim ha ka sorkar Meghalaya, nga lah ban ong, ba kane kadei ka skhim kaba bha tam eh” la ong u Myntri Rangbah. Ula pyntip ba ka bhah tyngka ka ailad ia ki projek ki bapher bapher, naduh ki jingdonkam kiba malu mala shaduh ki kam ban maramot bad ban shna pynbha ban pynthikna ban pynbiang ia ka jingdonkam jong ka imlang sahlang bad ka jingsam ia ka skhim ka long ha ka por kaba kloi tam bad kila don ki khep ba ia ka skhim la pyllait noh tang hapoh jong ka 2 kynta bad ka skhim ka ailad ban Transfer ne phah beit beit ia ka pisa sha ki nongioh jingmyntoi.