Nalor ba ka ai kam, ka Scientific Mining kan iada iaka mariang bad tehlakam iaki kam tih dewiong be-aiñ

U Myntri Sorkar uba dei ruh u MLA na Khliehriat constituency u Bah Kyrmen Shylla hynne ka sngi, ula pynpaw ba watla ka jingtih dewiong da ka juk stad saian mynta (Scientific Mining) ka lah ban pynduna ia ka jingiohnong, hynrei ha kaba kut kan pynkut noh ia ka jingtih dewiong be-aiñ hapoh ka Jylla.

Haba kren sha ki lad pathai khubor u Bah Kyrmen u la kam ba ki nongshong shnong ka Jylla khamtam na Rilum Jaintia ki la pdiang da ka dohnud kylluid mynsiem ïa ka rukom tih dewiong daka juk stad saian mynta (Scientific Mining). U Bah Kyrmen ula ong, ba ka Scientific Mining ym tang kan pynioh nong nong iaki trai par dewiong hynrei wat iaki nong shong shnong ki ban ioh kam ioh jam bad haka juh ka por kan iarap ban pynneh pynsah iaka mei mariang.

Ula kdew ba bun ki riew shimet ki la phai sha ki rukom tih mawshun be-aiñ hadien ka jingkhang blanket kaba la pynjari ha u snem 2014, namar ka la kylla long ka kam ban im na ka bynta jong ki.“Ym don mano mano ruh ba kwah ban leh ïa ki kam be-aiñ. Hynrei mynta ka long kaei kaei kaba sngewtynnad ba namar ka jingshimkhia ka Sorkar MDA I bad MDA II ka jingtih dewiong daka juk stad saian mynta kan sdang noh bad kane kan ai biang iaki paidbah iaka lad ban ioh kam ioh jam bad ha kajuh ka por ban teh lakam ïa ki kam be-aiñ” la ong u Bah Kyrmen.