Shi bynta jong ka Diamond Jubilee pynlong National Seminar ka Synod College

Kum shi bynta ka jingrakhe ia ka Diamond Jubilee, ka Synod College lyngba ka Historical Research hynne ka sngi ka la pynlong ia ka National Seminar kaba arsngi kynthih halor ka phang pdeng ‘His Footprints in Time: Trailblazers of Meghalaya in the Making of Modern India’.Ha kane ka sngi, la pynkup burom ruh ia ki riewshimet bad ia ki longiing longsem jong ki riewkhraw kiba la don bynta ha ka kam noh synniang ha ka pule puthi, ka kam sain pyrthei, ka thoh ka tar. U Myntri Rangbah ka jylla u Conrad K. Sangma haba kren ha kane ka sngi ula ong ba ka jingpynlong ia kane ka seminar kan iarap ban pynpaw pyrthei ia ki khana jong ki riewhlur ka jylla bad kan iarap ban ai mynsiem ia ki lawei pateng ban wan.

“ Ka jingpynlong ia ka seminar kadei ka por kaba biang ban iatai halor ka jingpynneh, ban lum thup iaki jingtip bad ban rakhe ia ki jingiathuhkhana shaphang ki khlawait kiba ym pat ju tip bad ki khraw pyrkhat kiba leh ia kiei kiei kiba nyngkong eh,” ula ong. Ha kajuh ka por, u Myntri Rangbah ka jylla u Conrad K. Sangma ula pynbna ia ki sienjam ban leh ia ki kam wad bniah ne Research kiba kongsan ban buddien ia ka jinglong tynrai bad ia ka jingmih jong ki jaidbynriew ki bapher hapoh ka jylla.

Ia kane ka Research Project, yn leh da ka kynhun kaba kyrpang hapoh jong ka tnad Arts & Culture kan don bynta ha kaban ngam jylliew ha ki jingwad bniah hapoh ka ri India bad shabar ri.“Ka jingthmu jong kane ka sienjam ka long ban pynneh pynsah bad pynkhlain ia ka jinglong tynrai ha ka kolshor jong ki jaidbynriew ka jylla Meghalaya,” ong u Conrad. Ha kane ka sngi la donlang u Dr. Wanwei Roy Kharlukhi u MP ka Rajya Sabha, ka Dr. Gayreen Lyngdoh Principal ka Synod College, ki nonghikai, ki samla pule nalor kiwei de.