Mih paidbah ka Hima Sohra ban pynrem ïa kiba kynthoh ïa ka Sohra

Ki paidbah ka Hima Sohra mynta ka sngi ki la mih paidbah ha ka jingiaid Rally kaba jai jai ka Peaceful Rally ban pynrem ia ki lad pathai khubor na bar jylla kiba kynthoh ia ka shnong Sohra kum ka ktem ba bun riewsniew. Ha kane ka sngi, ki paidbah ka Hima Sohra ki la wah ia ka dur ba heh jong u Raja Raghuvanshi hakhmat ka iing dorbar ka shnong ka Saitsohpen bad ki la pynlong ruh ia ka jingthang mombati kum ka dak ban pynpaw ka jingsngewlem halor ka jingshah pyniap u nongjngohkai u Raja na Madhya Pradesh. Kane ka jingiaid paidbah la sdang iaid naduh na ophis u Syiem ka Hima Sohra bad la pynkut ha iing Dorbar shnong ka Elaka Saitsohpen da ka jingialang ha kaba ki paidbah kynthup naduh ki longkmie, ki longkpa, khynnah, u MLA bad MDC ka Sohra ryngkat u Syiem, u Syiem khynnah, u Sordar  ki nongkitkam ka Hima bad kiwei de ki riew paidbah kiba wan jngohkai.

Lah ban kdew ba ia ka met u Raja Raghuvanshi la lap na shiteng ka arliang riat hajan ka parking Wei Sawdong ha ka 2 tarik Jylliew naduh ba u la jah rngai ha ka 23 tarik Jymmang,2025. Ki pulit ka Meghalaya ryngkat ka jingtreilang ki pulit ka Madhya Pradesh bad Uttar Pradesh, ki la ioh kem ia 5 ngut ki briew kiba la suba donkti ban iasylla bad ban pyniap ia u Raja Raghuvanshi, kynthup ka kurim u Raja ka Sonam Ka longkmie Miralda Shabong haba kren ha kane ka jingialang, ka la pynpaw ia ka jingsngewnguh ia u Blei uba la sngap ia ka jinduwai ki paidbah bad ka la ai khublei ia ka jingstad ki pulit ka jylla ban wad ia ki briew kiba donkti ha kaban pyniap ia u Raja. Ka kong Shabong ka la ong ba kum ka nong Sohra ka sngew sarong ia ka jingsngap jar jong ki bad ki la ioh ia u soh bah bha bad ban weng syndon ia ka jingkah dum ha kane ka shnong.

Ka la pynpaw ia ka jingsngewkhia halor ki lad pathai khubor na bar ri kiba la kynthoh ba ka jylla kadei ka ktem runar. Ka la ong ba kum ka trai shnong ka dawa ba ki lad pathai kidei ban kyang mynta ruh ba ki nong Meghalaya kim shym la leh ia ka kam pyniap. ” Ngim dei ki nongpyniap briew, namar kata kyang biang ban pynbna ha ki kamra pathai khubor ba ki nong Meghalaya kim dei ki nongpyniap briew, ” ong ka kong Shabong. Na ka liang u Syiem khynnah u Maremdor  Syiem ula phah ka jingsngewlem sha ka longiing u Raja bad ula ai jingmut ia ki paidbah kiba buh ia ki iing basa, ki pyniaid ia ki jaka jngohkai, kiba nongialam ia ki nongwan jngohkai ba kidei ban iatreilang bad ka sorkar khnang ba kum kine ki jingjia kin nym jia shuh hadien habud.