Lahduh ka Graceful Myrthong ha ka Mawthadraishan Dancing Star

Ka samal Graceful Myrthong ka la wan nyngkong ban iohrah ia ka namlahduh jong ka jingiakob shad kaba shi sngi kaba la tip kum ka Mawthadraishan Dancing Star ba la pynlong da ka Nongkasen Dancing Academy mynha ka 31 tarik u Jymmang, 2025 ha St Joseph Higher Secondary School, Nongkasen. Katba i heprit Rishamery Syiem i la wan baar bad ioh ruh ia ka kyrdan kum i nongiashim bynta ba dang khynnah tam. I heprit Nafitobet Marngar pat i la wan balai. Ha kane ka sngi la sam ruh ia ka Consolation prize ba la ioh da i heprit Isarijanai L. Marshiangbai. Ha kane ka sngi la ia don lang u bah Korbarlang Syiemlieh kum u kongsan, u Sordar shnong jong ka Nongkasen u Bah B.K.Budnah, Father John Albert Ryntathiang, u President ka All Meghalaya Dancers Association (AMDA) Bah Kitbok Thabah, ki dkhot ka Meghalaya Aids Control Society, ki khynnah skul, ki nonghikai bad kiwei kiwei.

Hashuwa ban sdang ia ka jingiakob shad la ioh ia ka jingkren pynsngewthh shaphang ki jingsniew bad jingkyrnidih drok uba la pynjot ia ka imlang sahlang lyngba u officer incharge ka Mairang Police Station u bah Kharjana. Hadien kane la ioh ruh iaka jingpynshai halor ka jingpang HIV AIDS. La ioh ruh ia ka jingkren na u president ka AMDA, u bah kitbok Thabah, uba la kyntu kynpham iaki heprit, ki samla donsap ka thaiñ  Mawthadraishan, kumjuh ia ka Nongkasen dancing Academy hapoh ka jingialam u samla Gary kynshikhar u ba dei ruh u President, ba u dei ban shimkhia ban btin lynti, ym tang ia ka thaiñ Mawthadraishan, hynrei dei ban plie lynti ruh ha ki rynsan State lavel bad national level.

Kum ba u la mihkhmat teng naka thaiñ bad ka State Meghalaya, u dei ruh ia lade ban sei lem ia kiwei kiban mih khmat ia ka thain. U President ka AMDA u la pynpaw ruh bun ki unit ki district ia ka ba ka AMDA ka la pynskhem bad mynta ka jingthmu ka long kumno ban prat lynti pat ia ka man ki district.