Dawa u Dr Mukul ban pynlong biang ia ka eksam thung kam pulit

U nongialam ka Liang Pyrshah u Dr Mukul Sangma hynne ka sngi ula dawa na ka Central Recruitment Board (CRB) ban pynlong eksamin thymmai halor ka jingthep kam Pulit hapoh ka Jylla. Ïa kane u Dr Mukul u la dawa hadien ka jingmih ki katto katne ki samla ba thepkam Pulit kila pynpaw ba ka don ka jinglehtuh haka por thoh eksamin (Written). Haba kren shaki lad pathai khubor u Dr Mukul u la kyntu ruh iaka CRB ba kan shim khia ia ki jingeh ba la pynpaw da ki kyrtong (samle) ha kaba ia dei bad ka jingpynlong iaka eksamin thungkam pulit.

Haba pule iaka jingpynbna laitkam pulit ba la pynbna ha ka 6 tarik Lber 2024, u Dr Mukul u la ong “Dei ban pynbna ba ka jingpynlong iaka eksamin (Written) thungkam pulit 2025 kala iap noh bad dei ban shah biang ïa baroh ki samla ban iakhun biang iaka eksamin (Written)”. U Dr Mukul u la pynpaw ba kine ki jingsngewkhia ki dei katkum ka jingai jingmut kaba u la ïoh beit na ki samla bad ki jingpeit bniah iaki jingïakren ba ki jingkynthoh ha ki rynsan social media. “Man la ka por ba ai jingpynbna ban thungkam, baroh ki kyndon ba donkam ban bud ki dei ban ïahap bad ki kyndon ba la buh bad ka Meghalaya Police Act, 2010,” u la ong.

U Nongialam ka Liangpyrshah u la kdew ia ka kyndon 18(10) jong ki jingbthah ba kyllum, kaba ong ba “yn kyntait ïa baroh ki ba thepkam lada lap ba kim bud ryntih iaki kyndon jong ka jingpynbna thungkam bad lada lap iaki ba lehtuh, lah ruh ban shim daki sienjam ba tyngeh katkum ki kyndon ain”. U la kynnoh ruh ba ka jingpynmih kyrwoh ba dang shen na ka CRB ka paw ba ka ia pyrshah ia kane ka kyndon bad ka la pynmih ia ka jingiakren paidbah.